Siońnia ŭ minskim restaranie-brovary «Siabry» prajšoŭ pieršy za 9 hadoŭ solny kancert hurtu «Krambambula». Usie kvitki na prahramu «Piraty Kamsamolskaha voziera» razyšlisia litaralna za niekalki dzion.
Hurt zatrymaŭ vystup na paŭhadziny, ale hetuju drobiaź za 9 hadoŭ čakańnia słuchačy mahli i daravać. Šmat u kaho za hety čas źjavilisia i vyraśli dzieci i tamu pachod na kancert razam ź imi vyhladaje całkam naturalna. Pad «Absent» Pavieł Arakielan vychapiŭ z tancplacu dziaŭčynu i pačaŭ tančyć ź joj na scenie (jana była nie suprać i joj, jak nam padajecca, heta spadabałasia). Kulinkovič niečakana źjaviŭsia na scenie ŭ svajoj etałonnaj cialniašcy i prakryčaŭ pra «Dvaccać trećje fieŭrala». «Žančynki za 40» z kuflem piva dekłamavali «Partyzanskuju». Moładź «kala 20-ci» taŭkłasia ŭ natoŭpie i pieražyvała toje, što my ŭžo daŭno pieražyli… Zdajecca, biełarusy navučylisia kalektyŭnamu prasłuchoŭvańniu svajoj kłasiki. Dobra, što dazvolili.
Čakajcie bolš fotaŭ nieŭzabavie.
Hurt «Krambambula» byŭ zasnavany ŭ 2002 hodzie jak zabaŭlalny sajd-prajekt Lavona Volskaha. Kalektyŭ viadomy pa chitach «Absent», «Hości», «Turysty», «Kab my kali kamu čaho». Na rachunku «Krambambuli» šeść studyjnych albomaŭ, apošni ź jakich, «Čyrvony štral», vyjšaŭ u 2015 hodzie.
Papiaredni solny kancert hurtu ŭ Minsku adbyŭsia 14 lutaha 2008 hoda va ŭžo niaisnym Westworld Club.
Sučasny skład: Lavon Volski (vakał, hitara), Pavieł Trypuć (vakał, hitara), Pavieł Arakielan (vakał, saksafon), Andrej Jakubčyk (vakał, truba), Aleś-Francišak Myškievič (vakał, bas-hitara), Pavieł Mamonaŭ (bubny).
