Kiraŭnik polskaha MZS Vitold Vaščykoŭski paviedamiŭ, što ministerstva nie pierastanie finansavać telekanał «Biełsat», adnak abjomy padtrymki stanuć mienšymi. Pra heta Vaščykoŭski zajaviŭ u intervju haziecie Rzeczpospolita.
«Ja nie maju ničoha ahulnaha z «Biełsatam», akramia taho, što ja adzin ź ich donaraŭ. My praciahniem padtrymku. Jana budzie mienšaj, ale dastatkovaj dla taho, kab vyžyć», — skazaŭ ministr.
Pa słovach kiraŭnika viedamstva, palaki, jakija žyvuć u Biełarusi, prosiać tranślavać TVP Polonia i TVP «Kultura», a nie «Biełsat».
«U nas jość vielmi supiarečlivyja źviestki pra ŭpłyŭ telekanała «Biełsat» na biełaruskaje hramadstva. Padtrymka hramadzianskaj supolnaści moža ažyćciaŭlacca pa-inšamu i bolš efiektyŭna», — skazaŭ jon.
Ab mahčymym skaračeńni finansavańnia polskim MZS telekanała «Biełsat» ad 17 da 5 młn złotych paviedamili ŭ kancy minułaha hoda. Pa słovach dyrektara telekanała, heta b pryviało da źniščeńnia telekanała. Biełaruskaja hramadzianskaja supolnaść i dziejačy kultury, u tym liku nobieleŭskaja łaŭreatka Śviatłana Aleksijevič, vystupili ŭ padtrymku «Biełsatu». U sacyjalnych sietkach zapuścili chešteh #biełsatžyvi. U Minsku prajšła akcyja apazicyi z zaklikam da biełaruskich uładaŭ uziać finansavańnie telekanała na siabie. 5 studzienia premjer-ministr Polščy Beata Šydła zapeŭniła dyrektara telekanała, što jamu ničoha nie pahražaje i finansavańnie budzie praciahnuta.