Śpiecsłužby viarbujuć niamała ludziej, ale tolki adzinki potym advažvajucca hučna abvieścić i admovicca ad supracoŭnictva. Rezanansny śviežy vypadak — historyja Siarhieja Palčeŭskaha.
Słavamir Adamovič i Aleś Jemialjanaŭ
U 1991 hodzie pra viarboŭku z boku KDB abvieścili adrazu dvoje paetaŭ. Aleś Jemialjanaŭ zrabiŭ heta ŭ «Svobodnych novostiach». Narodny piśmieńnik Biełarusi Vasil Bykaŭ z mudraj ironijaj napisaŭ u knizie miemuaraŭ «Doŭhaja daroha dadomu»: «Piśmieńnickaja hramadskaść padvierhła Jemialjanava astrakizmu, choć było nieviadoma, za što: za toje, što vierbavali, ci za toje, što jon pryznaŭsia». A jašče da hetaha na padobny krok pajšoŭ paet Słavamir Adamovič. Jaho list nadrukavała «Litieraturnaja hazieta». Pa słovach Adamoviča, za jaho ŭzialisia jašče ŭ 1986 hodzie.
Andrej Zajcaŭ i Uład Michajłaŭ
U śniežni 2001 hoda ŭ Homieli skončyŭ žyćcio samahubstvam «zubroviec» Andrej Zajcaŭ. U pieradśmiarotnaj zapiscy jon napisaŭ, što jaho šantažavaŭ i vierbavaŭ KDB.
U studzieni 2007 hoda student prahramy Kalinoŭskaha z Homiela Uład Michajłaŭ na staroncy ŭ «ŽŽ» pryznaŭsia ŭ supracoŭnictvie z KDB i paviedamiŭ ab svaim rašeńni spynić kantakty. U Michajłava byŭ pazyŭny «Viektar». U Michajłava byli vyraznyja psichałahičnyja asablivaści. U vyniku jon viarnuŭsia ŭ Biełaruś, tut jahonyja ślady hublajucca. Pa adnoj ź viersij, jon taksama skončyŭ žyćcio samahubstvam.
Aleś Michalevič
Samy hučny vypadak. U apošni dzień zimy 2011 hoda na ekstrannaj pres-kanfierencyi eks-kandydat u prezidenty Aleś Michalevič zajaviŭ, što jaho vymusili padpisać damovu ab supracoŭnictvie z KDB. Michalevič byŭ źniavoleny paśla padziej Płoščy-2010. Taksama Michalevič zajaviŭ ab katavańniach, jaki prymianialisia suprać jaho i inšych udzielnikaŭ Płoščy, u źniavoleńni. «Umovaj majho vyzvaleńnia stała padpisańnie damovy ab supracoŭnictvie; Ja śviadoma pajšoŭ na hety krok, i heta było pradyktavana nie ciskam i katavańniem, ale žadańniem danieści infarmacyju pra toje, što adbyvajecca sa źniavolenymi», — havaryłasia ŭ zajavie Michaleviča. Praź niejki čas Michalevič uciok z krainy, adnak praz paru hadoŭ viarnuŭsia nazad.
Uładzimir Kobiec
Kiraŭnik štaba kandydata ŭ prezidenta Andreja Sańnikava na vybarach-2010 Uładzimir Kobiec zrabiŭ zajavu ab supracoŭnictvie tolki paśla taho, jak źjechaŭ z krainy. «Inšaha šlachu vyjści z turmy KDB tady nie było», — pisaŭ Kobiec. «Tolki prafiesijnaja dapamoha śpiecyjalista pa psichałohii katastrofaŭ dazvoliła z časam pazbavicca ad pieraśledu žachaŭ». Uładzimir Kobiec praciahvaje žyć u emihracyi.
Siaržuk Paŭlukievič
U toj samy hod pryznańnie ab viarboŭcy z boku śpiecsłužb zrabiŭ administratar supołki «Ukantakcie» «My za vialikuju Biełaruś» Siaržuk Paŭlukievič. Varta adznačyć, što heta adbyvałasia padčas «maŭklivych akcyj pratestu», jakija ładzilisia praz sacsietki. Paŭlukievič adznačyŭ, što podpisu ab supracoŭnictvie ad jaho vybivali šlacham katavańniaŭ.
Sakrat Janovič
A heta prykład z susiedniaj krainy. Viadomy biełaruski piśmieńnik z Padlašša Sakrat Janovič u lustracyjnaj ankiecie pryznaŭsia, što byŭ pazaštatnym supracoŭnikam śpiecsłužb. Janovič naziraŭ za asiarodkam biełaruskaha tydniovika «Niva», a taksama Biełaruskaha hramadska-kulturnaha tavarystva ŭ Polščy. Cikava, što Janovič u intervju «NN» kazaŭ, što viarboŭka adbyvałasia pa-biełarusku. «Ja nikomu nie zrabiŭ nijakaj škody, ale drenna toje, što ja paddaŭsia» — skazaŭ Sakrat Janovič.
