Mikoła Statkievič paśla vychadu z turmy, 27 sakavika. Fota Siarhieja Hudzilina.
Palityka Mikołu Statkieviča adpuścili. Pra heta «Našaj Nivie» paviedamiła jaho žonka Maryna Adamovič.
«Piać chvilin tamu [8:50] jaho padvieźli dachaty, ad piatnicy jon znachodziŭsia ŭ SIZA KDB», — dadała Maryna Adamovič.
Mikoła Statkievič raspavioŭ siońnia žurnalistam pra zatrymańnie. 23 sakavika zranku «adarvaŭsia» ad nazirańnia za im, uciok u mietro, pajechaŭ na kvateru da znajomych.
Kala 21.30 taho ža dnia ŭ kvateru pryjšli pravaachoŭniki: Statkievič kaža, nie mieŭ z saboj elektronnych pryładaŭ, pa jakich jaho možna było b adsačyć. Kvateru, dzie jon znachodziŭsia, adčynili fomkaj. Tyja, chto jaho zatrymlivali, pakazali paśviedčańni supracoŭnikaŭ MUS, jaho zatrymańnie zdymali na videa. Z kvatery jaho vyviali ŭ «šykoŭny Leksus», naciahnuli na vočy šapku. Advieźli ŭ SIZA KDB. Jon raskazvaje, što ź im razmaŭlaŭ śledčy Vasileŭski.
«Mnie pakazali pastanovu ab zaviadzieńni kryminalnaj spravy ab masavych biesparadkach. Maŭlaŭ, z 2011 hoda ja rychtavaŭ biesparadki. Śmiešna, ja byŭ u źniavoleńni ŭ hety čas! Dakumient byŭ zaćvierdžany pieršym namieśnikam I.Sierhijenkam 21 sakavika.
Spravu «Biełaha lehijona» Statkievič nazyvaje «spravaj ab «Zarnicy».
Mianie źmiaścili ŭ kamieru SIZA KDB. Ja kali vychodziŭ u prybiralniu, to kryčaŭ inšym: «Tut znachodzicca Mikałaj Statkievič».
Fota Siarhieja Hudzilina
U pałovie siomaj ranicy siońnia mianie vyvieli z kamiery, abšukali, addali rečy. Pasadzili ŭ mikraaŭtobus, skazali, što viazuć na śledčyja dziejańni. Ale ja pabačyŭ, što viazuć pa Partyzanskim praśpiekcie, vyvieźli ŭ bok Mahilova, zbočyli na Žodzina, vypuścili na prypynku Sokał. Telefanavaŭ žoncy, nie zmoh datelefanavacca. Uziaŭ taksi i dajechaŭ dachaty. Ja prynošu prabačeńnie ŭsim mužnym ludziam, što vyjšli 25-ha, a nie zdoleŭ pryjści. Ale nie pa majoj voli».
«Kali Łukašenka 20 sakavika ŭ Mahilovie zajaviŭ, što byli bajeviki, to heta niapraŭda. KDB zavioŭ spravu ranicaj nastupnaha dnia».
«Ja pytaŭsia śledčych: a Daškieviča za što ŭziali? Jon tolki pałatku ŭ Kurapatach pastaviŭ». Mnie ŭ adkaz: «Vy viedajecie, jakija ŭ jaho ŭ pałatcy byli ludzi», «A za Łahvinca za što źbili?» — «Jon prytvarajecca», — mnie ŭ adkaz.
Nahadajem, što ad piatnicy eks-kandydat u prezidenty Mikoła Statkievič nie vychodziŭ na suviaź. Jon uziaŭ na siabie adkaznaść za akcyju 25 sakavika, jakaja skončyłasia brutalnymi zatrymańniami.
U niadzielu ŭ SIZA KDB i SIZA MUS skazali Marynie Adamovič, što Mikoły ŭ ich niama.
«My niedaacanili stupień paniki hetaha režymu», — kaža Statkievič.
Lidar biełaruskaj apazicyi Mikoła Statkievič zaklikaŭ praciahnuć pratesty ŭ Minsku 1 Maja i 9 Maja. «1 Maja źbiaremsia na majoŭku, naprykład, na Kastryčnickaj płoščy. A 9 Maja projdziem razam ź vieteranami, uskładziem kvietki, sa spadziavańniem, što Biełaruś znoŭ budzie vyzvalenaja», — skazaŭ Statkievič.
