Śniežnaja bura, jakaja abrynułasia na ZŠA, praktyčna całkam paralizavała najbujniejšy horad krainy — Ńju-Jork, paviedamlajuć infarmahienctvy.
Tut i nižej fota: Getty
Ułady Ńju-Jorka rasparadzilisia zakryć škoły i praktyčna ŭsie municypalnyja ŭstanovy. Spynieny ruch pasažyrskich paromaŭ na Ist-Ryvier i na Hudzonie. U ńju-jorkskim mietrapalitenie spynieny ruch ciahnikoŭ na učastkach šlachoŭ, jakija prachodziać pa pavierchni. Žycharoŭ horada prosiać nie karystacca asabistym aŭtatranspartam.
U ńju-jorkskich aeraportach admieniena abo pieraniesiena kala 1,2 tys. rejsaŭ. Raniej paviedamlałasia, što ŭ cełym pa krainie admieniena bolš za 5 tys. rejsaŭ.
U susiednim ź Ńju-Jorkam štacie Kaniektykut ułady pryniali rašeńnie ab poŭnym spynieńni ruchu transpartu, za vyklučeńniem mašyn dziažurnych słužbaŭ.
Mocny śniehapad taksama vyklikaŭ masavyja adklučeńni elektraenierhii. Tak, na Uschodnim uźbiarežžy ZŠA biez elektryčnaści zastalisia bolš za 100 tysiač spažyŭcoŭ. Najbolš paciarpieli štat Virdžynija (abiastočana kala 50 tysiač domaŭładańniaŭ) i susiedni Merylend (kala 30 tysiač domaŭładańniaŭ). Niekalki tysiač spažyŭcoŭ nie majuć elektraenierhii ŭ štatach Dełaver, Ńju-Džersi i Fiładelfija.
Na vulicy amierykanskich haradoŭ vyviedzienyja tysiačy adzinak śniehaŭboračnaj techniki. Va ŭborcy śniehu supracoŭnikam kamunalnych słužbaŭ dapamahajuć vajskoŭcy Nacyjanalnaj hvardyi.
