U efiry «Biełaruś-1» źjaŭviŭsia śpiecyjalny repartaž pad nazvaj «Zvanok siabru». Prahrama źjaviłasia terminova, u raskładzie pieradač jaje nie było. Kab raskazać «usiu praŭdu» pra «maršy niedarmajedaŭ», daviałosia adkłaści sieryjał «Śled».
Jakija idei byli ahučanyja ŭ rasśledavańni «Zvanok siabru», padrychtavanym Ahienctvam televizijnych navinaŭ, i čym jany byli abhruntavanyja?
1. Simvały demanstrantaŭ (kułak i łozunh «Basta») — znak biady
«Usiudy, dzie bili hetym kułakom, pryjšła biada». Hety znak upieršyniu vykarystoŭvaŭsia ŭ Juhasłavii padčas baraćby suprać Słabadana Miłošaviča. Voś i Juhasłavii, maŭlaŭ, bolš niama.
Nasamreč «kułak» nie vykarystoŭvaŭsia ni padčas adnoj inšaj akcyi, aproč minskaj. Heta była pryvatnaja inicyjatyva «zubroŭcaŭ». U rehijonach ludzi vychodzili pad-bieł-čyrvona-biełymi ściahami albo bieź simvoliki.
2. Ruchaviki pratestaŭ — Statkievič, Sańnikaŭ, Bandarenka, Radzina, Viniarski i Afnahiel
Televizijonščyki nazvali šeść kankretnych imionaŭ.
Maŭlaŭ, Statkievič stvaryŭ «fejkavy» (cytata) Biełaruski nacyjanalny kanhres. A ŭ «Jeŭrapiejskaj Biełarusi» zastałosia piać čałaviek (cytata). I hetyja šaściora, akazvajecca, ŭ stanie vyvieści na vulicy tysiačy ludziej.
3. Ułady nie saromiejucca pryznavać, što lidaraŭ apazicyi pa-raniejšamu prasłuchoŭvajuć
U efiry prahučała pryvatnaja razmova Statkieviča sa Źmitrom Bandarenkam. U joj nijakaha kryminału — Statkievič kaža, što patrebna vykarystańnie sacyjalnych sietak i druk nalepak. Aproč taho, Bandarenka kaža, što davodzicca tracić ułasnyja hrošy. Taksama ŭzhadvajecca pra apłatu prajezda dla niejkich 160 čałaviek.
Inšaja razmova nibyta z «ukrainskim biznesmienam Alaksandram Smancaram» — tym samym padazronym čałaviekam, pra jakoha BT raskazvała jašče ŭ 2010 hodzie. Toj tady zaklikaŭ Statkieviča «zachodzić u Dom urada i naciskać knopki».
Pasiarod razmovy Statkievič raptoŭna pierachodzić z ruskaj movy na biełaruskuju. Pry hetym frazy, mahčyma, vyrvanyja z kantekstu. Havorka viadziecca pra $20 na čałavieka. Ale što heta za apłata? Kamu? Za što? Uciamnaha adkazu niama.
4. Anarchisty rychtavali terakt na 3 lipienia 2014 hoda
U adnym z momantaŭ pieradačy viadučy zajaviŭ, što pierad 3 lipienia 2014 hoda u Babrujsku byŭ zatrymany «anarchist Siarhiej Ramanaŭ», jaki nakiroŭvaŭsia ŭ Minsku na śviatkavańnie aficyjnaha Dnia niezaležnaści. U jaho zaplečniku nibyta znajšli 155 hramaŭ traciłu.
«Nieskładana ŭjavić, što b adbyłosia ŭ natoŭpie, kali b vybuchovoje rečyva było vykarystana pa svaim pramym pryznačeńni», — padsumavaŭ hołas za kadram.
Raniej ni pra jakija zatrymańni anarchista Ramanava siłaviki nie paviedamlali.
5. «Pravy siektar» pasprabuje razhajdać Biełaruś
Heta samaja sumburnaja častka. Naprykład, raspovied viadziecca pra anarchistaŭ, udzielnikaŭ Majdana. Łohika viadučych nastupnaja — paviedamlajecca, što biełaruska ŭdzielničała ŭ padpale suda va Ukrainie. Paśla raskazvajecca, što Statkievič pryjšoŭ padtrymać abvinavačanych pa «spravie hraficistaŭ» u minskim sudzie. I naprykancy ŭklučajecca zapis z 2010 hoda, dzie biznesmien Smancar raić «naciskać knopki». Vy ŭchapili ŭzajemasuviaź?
Pakrysie prahrama pierajšła ź Biełarusi i «maršu niedarmajedaŭ» na prablemy Ukrainy.
Admietna, što BT adklučyła kamientary pad svaim «rasśledavańniem». Ale kolkaść dyzłajkaŭ usio adno značna pieravyšaje łajki.
