Natallu Papkovu zatrymali 3 sakavika. Hetaja aktyvistka «Maładoj Biełarusi» była adnoj z tych, chto vystupaŭ arhanizataram vuličnych akcyj pratestu ŭ Breście. A na 5 sakavika akurat čakałasia čarhovaje mierapryjemstva. U paniadziełak paśla abiedu Natalla Papkova raskazała «Našaj Nivie» ab abstavinach zatrymańnia.
«U piatnicu razam ź siastroj ja vychodziła z padjezda ŭłasnaha doma. Padyšli dva milicyjanty da nas. Adzinaje, što skazali: «Ty jedzieš z nami». Nie dali patelefanavać nikomu, siastru nie čapali. Ja tolki prasiła, kab joj addali moj telefon, ale nie dazvolili.
Pavieźli na vulicu Savieckuju ŭ psichanieŭrałahičny dyspanser. Tam pa kabinietach mianie nie vadzili. U hety čas adzin ź milicyjantaŭ — moj učastkovy — biehaŭ pa kabinietach i źbiraŭ dakumienty.
Potym my pajechali da prakuratury. U budynak mianie nie puścili, ja siadzieła ŭ mašynie i čakała. Chvilin 20 milicyjanty znachodzilisia tam.
U vyniku mianie pavieźli na Płosku [pryharad Bresta, dzie znachodzicca psichijatryčnaja lakarnia — «NN»]. Pry hetym mnie nie kazali, kudy viazuć i navošta. U Płoscy mnie skazali, što mianie zatrymali pa sankcyi prakurora. Pry hetym nijakich papier nie pakazvali, tolki skazali, što ja zastanusia tut.
Nijakimi tabletkami mianie nie karmili, lačeńnia ŭvohule nie było. Prosta trymali i ŭsio, nikoha nie puskali, aproč siastruni. Pryjazdžali maje siabry z «Maładoj Biełarusi» ź Minsku, Viciebsku, i ich niejkim cudam taksama prapuścili razam ź siastroj.
U pałacie, aproč mianie, było jašče troje čałaviek — chvoryja, niaščasnyja ludzi.
Na vychadnych daktary ničoha nie kazali. Adnak siońnia na abchodzie skazali, što byŭ sihnał ad susiedzieŭ, nibyta ja namahałasia skončyć žyćcio samahubstvam. Ja ŭpeŭniena, što heta fikcyja i ničoha padobnaha susiedzi skazać nie mahli.
Pravodzili niejkija psichałahičnyja testy, zadavali pytańni, byli kubiki, jakija treba było składać…
Kaniečnie, źviazvaju heta sa svaim udziełam u «akcyjach niedarmajedaŭ», ja była adna z arhanizataraŭ. Była na akcyi 17 lutaha ŭ Minsku, a paźniej była na ŭsich u Breście. Mianie nieadnojčy vyklikali ŭ milicyju, ale tam ničoha nie było na mianie, to vyrašyli zrabić tak, jak zrabili.
Nie vyklučaju, što heta rabiłasia dla taho, kab ja nie paŭdzielničała ŭ maršy ŭ hetuju niadzielu».
Fota z fejsbuka Artura Fińkieviča.
Natalla Papkova dałučyłasia da «Maładoj Biełarusi» 7 hadoŭ tamu. Vučyłasia ŭ Pryborabudaŭničym kaledžy pa śpiecyjalnaści «strachavaja sprava». Ciapier maje svaju klininhavuju kampaniju ŭ Breście.
