Małady biznesoviec z Žodzina Pavieł Kaściankoŭ praź niekalki miesiacaŭ płanuje zapuścić prodaž pitnoj vady pad brendam «Biełyja kryły».
«Usio afarmleńnie ja płanavaŭ na biełaruskaj movie. Ja patryjot, choć sam nie razmaŭlaju pa-biełarusku, ale chacieŭ by navučycca, kab i dzieci razmaŭlali. Raspracavanaja pryhožaja etykietka z vyšyvankaj, busłom. Kali ja pavioz jaje na ŭzhadnieńnie ŭ Barysaŭ, u Dziaržstandart, to tam mnie skazali, što tak być nie moža. Ja vielmi mocna zasumniavaŭsia ŭ kampietencyi supracoŭnika, tamu paprasiŭ spasyłki na dakumient», — raskazvaje Pavieł Kaściankoŭ.
U vyniku biznesoviec atrymaŭ standartnuju spasyłku na Techničny rehłamient Mytnaha sajuza, dzie havorycca pra toje, što infarmacyja abaviazkova pavinna być na ruskaj movie.
Ale razam z tym była dasłanaja spasyłka na dakumient STB 1100-2016, jaki ŭstupiŭ u siłu 1 lutaha 2017 hoda. Jaho pryniaćciem zajmaŭsia Dziaržstandart.
U artykule 4 dakumienta havorycca: «Infarmacyja dla spažyŭca ŭ vyhladzie tekstu nanosicca na ruskaj abo ruskaj i biełaruskaj movach». Vychodzić, što vyklučna pa-biełarusku infarmacyju nanieści nielha.
Pavieł Kaściankoŭ źviartaje ŭvahu, što hety standart supiarečyć zakonu «Ab movach», u artykule 30 jakoha havorycca: «Markiroŭka tavaraŭ, etykietki na tavarach, instrukcyi pa karystańni tavarami vykonvajucca na biełaruskaj abo ruskaj movie. Markiroŭka tavaraŭ, pryznačanych na vyvaz za miežy Respubliki Biełaruś, vykonvajecca na biełaruskaj ci ruskaj movie abo na movie zakazčyka. Nazvy ŭ tavarnych znakach padajucca na biełaruskaj abo ruskaj movie».
Pavieł Kaściankoŭ kaža, što paśla takoha vyrašyć uvohule admovicca ad biełaruskaj movy, bo rabić etykietki na dźviuch prosta niavyhadna dla jaho.
Z padobnaj prablemaj taksama sutyknulisia jašče adny vytvorcy vady — «Narač». Namieśnik hienieralnaha dyrektara Natalla Barodzič kaža, što jany źviarnulisia ŭ Administracyju prezidenta z prośbaj darealizavać pradukcyju sa staroj markiroŭkaj, bo biełaruskamoŭnych etykietak u ich jašče na 14700 rubloŭ, a taksama spasłalisia na niełahičnaść STB 1100-2016.
A voś novy raźliŭ buduć vykonvać u taru z ruskamoŭnaj etykietkaj. Rabić na dźviuch movach u pradpryjemstvie taksama nie bačać sensu. Da hetaha bolš za piać hadoŭ «Narač» była vyklučna biełaruskamoŭnaj u afarmleńni.
Vyhladaje, što i astatnija redkija vytvorcy, jakija karystalisia ŭ afarmleńni svajoj pradukcyi biełaruskaj movaj, mohuć admovicca ad jaje.
