«Učora adbyłasia vialikaja sustreča ź ministram kultury Barysam Śviatłovym, — piša ŭ svaim fejsbuku režysior Andrej Kurejčyk.
— Mnie važna było skazać jamu ŭ vočy, što dyviersija ŭ dačynieńni da prakatu «Party-zan filma» Iryny Bielakovaj — heta podłaść. Taktoŭna danios jamu dumku, što zryŭ bolš za 40 sieansaŭ biełaruskaha filma nie da tvaru Minkultu. Ad hetaha prajhraŭ biełaruski hladač, a vyjhrali impartnyja karciny.
Zrešty, bolš času nadali pazityŭnamu paradku. Prapanavaŭ źniać film pra Skarynu. Nie tolki tamu, što sioleta 500 hadoŭ knihadrukavańniu. Ale i tamu, što Skaryna — pieršy biełaruski inavatar, intelihient, humanist, čałaviek jeŭrapiejskich kaštoŭnaściaŭ, simvał Epochi Adradžeńnia ŭ Biełarusi. Jaho fihura nie vyklikaje raskołu hramadstva. Padaŭ scenar na pieradpitčynh. Pahladzim…
Ministr pryznaŭ, što 99,5% kino ŭ kinateatrach Biełarusi — impart (dla paraŭnańnia, u Rasii 19% na ekranach — heta rasijskaje kino). Situacyja prosta krytyčnaja.
Maje prapanovy byli prostymi:
1. Surjozna źnizić biudžety biełaruskich filmaŭ. Zdymać ciapier filmy daražej za 300 tysiač dalaraŭ — duraść, u nas vielmi maleńki rynak. Lepš zrabić 10 filmaŭ pa 300 i vypuskać ich na praciahu hoda ŭ kinateatrach, adbivajučy dolu ŭ zamiežnikaŭ i dajučy pracu biełaruskaj režysury i kinahrupam, čym adzin za try lama, jaki pa fakcie źbiare stolki ž, kolki i za 300 tysiač. A naohuł całkam kamfortna možna zdymać karciny i za 150 tysiač. Karaciej, źnižeńnie biudžetaŭ adsiače raznastajnaje žullo, jakoje pad pokryvam čynoŭnikaŭ vyciahvaje z krainy miljony i nie viartaje potym ničoha, i stvoryć vielizarnuju chvalu novaha biełaruskaha kiniematohrafa.
2. Kali na rynku adzin impart, całkam apraŭdana brać ź impartu dadatkovyja zbory i nakiroŭvać ich na padtrymku biełaruskaha kino. Heta ździek, što Minkult stavicca da impartnych filmaŭ z bolšym pijetetam, čym da biełaruskaj pradukcyi (my malaŭničaje tamu paćvierdžańnie). Całkam možna ŭvieści zbor u 1-2% na karyść biełaruskaha kino. Abo pastavić canu prakatnych paśviedčańniaŭ dla zamiežnych karcin u 1-3 tysiačy dalaraŭ. Nie dumaju, što heta budzie prablema dla Dyśnieja, Marvieł abo Fiodara Bandarčuka) A dla biełaruskaha kino — heta sotni tysiač dalaraŭ žyvoj padtrymki.
3. I hałoŭnaje, ja prapanavaŭ ministru prajekt ličbavaha telekanała «Biełaruskaje kino». Kali kinateatry i dziaržkanały nie chočuć pakazvać niezaležnyja filmy, ekśpierymientalnyja karotkija mietry, animacyju, surjoznuju dakumientalistyku (a nie chočuć, tamu što bolš rentabielna pakazvać zamiežnyja kamiercyjnyja pradukty), to nieabchodny kanał, dzie heta ŭsio budzie pradstaŭlena. U biełaruskich kinošnikaŭ pavinna być placoŭka dla pakazu svajho kino!
Čamu ŭ lubym ličbavym rasijskim pakiecie abaviazkova jość kanał, pryśviečany rasijskamu i savieckamu kino, a ŭ nas — niama?
Ja prapanavaŭ prajekt kanała «Biełaruskaje kino», jaki źbiare ŭ svajoj biblijatecy ŭsio biełaruskaje kino: karciny «Biełaruśfilma», sučasnaje biełaruskaje dziaržaŭnaje i niezaležnaje kino, ekśpierymientalnaje i navučalnaje kino, karotkija mietry, vydatnuju biełaruskuju dakumientalistyku i animacyju, nacyjanalnyja prahramy «Listapada».
«Biełaruskaje kino» stanie placoŭkaj dla kinakrytykaŭ, režysioraŭ, entuzijastaŭ biełaruskaha kino, dyskusijnaj placoŭkaj ab nacyjanalnym kiniematohrafie, raskaža ab jaho historyi, a hałoŭnaje: źbiare biblijateku ŭsiaho biełaruskaha kiniematohrafa (asabliva sučasnaha), a pry mahčymaści, stanie i zamoŭcam novych stužak. Kali biełaruskija filmy i sieryjały nie cikaviać BT, ANT i STV, i jany pakazvajuć rasijskuju i zamiežnuju pradukcyju, značyć, my stvorym kanał, jaki naadvarot, nie budzie zakuplać ničoha zamiežnaha, pakazvać vyklučna biełaruski kinakantent. Naš kancept kankretny i vyrazny. Jość prajekt. Jość kamanda. Ja skazaŭ ministru, što my z partniorami hatovyja ŭziać na siabie vydatki pa stvareńni takoha kanała (ŭ kabielnym farmacie dla Zały, MTISa i Kosmas-tb — jany nie vielmi vialikija), i paprasiŭ sadziejničańnia.
Pahladzim…»
