7 studzienia ŭ Ńju-Jorku pamior dziejač biełaruskaj emihracyi Anton Šukiełojć.
Anton Šukiełojć u svaje 101 hod, fota Vitala Zajki
Pra heta paviedamiŭ Vitaŭt Kipiel. Apošnija dni sp. Šukiełojć paŭtaraŭ słovy Kupały
Prystaŭ ja žyć na biełym śviecie,
Choć stolki ŭvokała žyćcia;
Zaviali dumki na raśćviecie,
Duša žadaje niebyćcia.
Janka Zaprudnik z nahody 100-hadovaha jubileja sp. Šukiełojcia pisaŭ: «Dla jaho sercavinaj našaha hramadskaha žyćcia byli — jak taja voś u hiraskopie — demakratyčnaje prava asoby na svaju dumku i razam z tym sprava svabody j niezaležnaści Baćkaŭščyny-Biełarusi. U imia hetych dvuch ideałaŭ-pryncypaŭ — prava mieć svoj pohlad na rečy i dbać pra volu Baćkaŭščyny — naš jubilar sadziejničaŭ zhodzie ź ludźmi j pamiž ludźmi. Ja blizka supracoŭničaŭ ź im na hramadskaj nivie, pačynajučy z 1957 hoda, i mahu z poŭnaj padstavaj zaśviedčyć jahony dabradziejny, stabilizacyjny ŭpłyŭ na žyćcio našaj hramady».
Pachavany Anton Šukiełojć budzie na biełaruskich mohiłkach u Ist-Branśviku (Ńju-Džersi).
***
Anton Šukiełojć naradziŭsia 16 lipienia 1915 h. na Ašmianščynie, skončyŭ adździaleńnie słavianskaj fiłałohii i etnahrafii humanistyčnaha fakulteta Univiersiteta Stefana Batoryja ŭ Vilni (1939). Padčas studenctva pracavaŭ va ŭniviersiteckim etnahrafičnym muziei. Byŭ siabram Biełaruskaha studenckaha sajuza. Paśla prychodu savietaŭ pracavaŭ nastaŭnikam na Ašmianščynie byŭ zahadčykam haradskoha adździeła narodnaj aśviety i školnym inśpiektaram-mietadystam Ašmianskaha rajona.
Padčas nacysckaj akupacyi pracavaŭ u adździele aśviety i kultury Minskaj haradskoj upravy, byŭ zahadčykam Biełaruskaha histaryčnaha muzieja. Ź leta 1944 h. na emihracyi.
U pačatku 1950-x hh. pierajechaŭ u ZŠA. Braŭ aktyŭny ŭdzieł u biełaruskim ruchu, šmathadovy staršynia Biełaruska-amierykanskaha zadzinočańnia, člen redakcyi haziety «Biełarus», člen Biełaruskaha instytuta navuki i mastactva.
Aŭtar dziasiatkaŭ artykułaŭ, uspaminaŭ, niekrałohaŭ apublikavanych u hazietach «Baćkaŭščyna» i «Biełarus».
U 2015 h. u ZŠA vielmi šyroka adznačałasia jaho 100-hodździe.
