U rasijski prakat u najbližejšy čas vyjdzie multfilm pra dvuch chłopcaŭ-suvoraŭcaŭ, stvorany pry ŭdziele śpiecsłužbaŭ i pravasłaŭnaj carkvy. Finansujecca prajekt «Dabračynnym fondam dapamohi i ŭzajemadziejańnia imia Siarhieja Radaniežskaha».
Niadaŭna źjaviłasia prevju hetaha mulcika, dzie vystupili jahonyja stvaralniki i vidać niekatoryja kadry stužki. Nazyvajecca jon «Dzieci suprać čaradziejaŭ».
Pavodle siužeta, nad Rasijaj znoŭ pahroza — «vorah» choča raźličycca za parazu ŭ Druhoj suśvietnaj vajnie i tamu znoŭ napadaje, praŭda, nie 22 červienia, a 1 vieraśnia.
A hałoŭnyja hieroi vypraŭlajucca ŭ Šatłandyju, kab viarnuć z temtejšaha ŭniviersiteta «akultnych navuk» rasijskich dziaciej, jakim tam naviazvajuć čužyja kaštoŭnaści, a zamiest čaradziejstva vučać razvału krainy.
Adtul ža hałoŭny antahanist — Leanard.
«Jon zaniaŭsia akultyzmam i praz heta zdradziŭ radzimie, — apisvajecca złodziej u prevju. — Ale hetaha nie vidać — jon nie staŭ adkrytym voraham u varožaj formie, vonkava jon zastaŭsia tym ža, źmianiłasia jahonaja sutnaść: jon jak by ruski, ale nienavidzić Rasiju, jon nie parušaje zakony, navat vielmi zakonapasłuchmiany. Ale jon — vorah, strašniejšy za taho, što byŭ 75 hadoŭ tamu. Vonkava jaho nie adroźniš, ale jon napaŭniaje nianaviściu da Rasii padrastajučaje pakaleńnie, jany vyrastajuć vorahami našaj ajčyny. Takija dzieci razmaŭlajuć pa-rusku, navat žyvuć tut, ale dušoju jany ŭ inšych krainach».
Dalej raskazvajecca, što ŭ baraćbie z vorahami Rasii chłopcam dapamahuć «daśviedčany hienierał raźviedki Cialehin i blizkija pa duchu ludzi-pradstaŭniki roznych narodaŭ: hreki i sierby, abjadnanyja adzinaj vieraj i tradycyjami, jany zbližajucca i padtrymlivajuć adzin adnaho».
«Kali maham udasca naviazać svaje kaštoŭnaści dzieciam, to im navat vajavać ni z kim nie daviadziecca, bo našyja ludzi buduć lubić kaštoŭnaści voraha», — kaža hołas za kadram i sa škadavańniem dadaje, što «tak lohka adurmanić dziciačy rozum».
Tut ža ŭ prevju źjaŭlajecca pravasłaŭny śviatar i kaža pra vajnu, što ŭžo viadziecca suprać Rasii, a taksama, što «my nie musim addavać svaich dziaciej na vychavańnie, my pavinny sami ich vučyć. Heta multfilm pra praŭdu, jakaja jana jość nasamreč».
Hety śviatar nie vypadkovy — blizkija da RPC fondy spansarujuć vychad hetaha mulcika, a ŭ im samim prapahandy rasijskaha pravasłaŭja.
Taksama ŭ anonsie vystupaje supracoŭnik rasijskich śpiecsłužbaŭ, jaki raskazvaje pra ruskuju dušu i niebiaśpieku, što ruskija mohuć stać ruskamoŭnymi praz padkopy vorahaŭ. A hety mulcik — vydatny ŭzor baraćby dvuch chłopcaŭ za baćkaŭščynu.
«Heta vychavańnie Paŭlikaŭ Marozavych, kab jany zajmalisia vykryvalnictvam u dziciačym asiarodku, — kaža žurnalist Andrej Pačobut. — Pasył vielmi prosty — siarod nas, dziaciej, jość vorahi, jakija ad nas nie adroźnivajucca, ale ź imi treba zmahacca. Vorah akreślivajecca vielmi kankretna praz nabor asacyjacyj — škoła hetaja ŭ Šatłandyi, anhłasaksonskaj krainie, «napadajuć» na Rasiju taksama adniekul z Zachadu. A rasijskija śpiecsłužby ŭžo ŭ pryncypie i nie chavajuć, što hetyja mulciki vypuskajucca pad ich kuratarstvam. Niezvyčajny kanhłamierat — carkva i śpiecsłužby».
«Heta kankretnaja sproba paŭpłyvać na śviadomaść ludziej unutry krainy i za miežami. Pry hetym mišeni — dziciačyja rozumy, jakija praściej za ŭsio paddajucca manipulacyjam. Heta ŭžo nie pieršy taki mulcik. Uspomnim chacia b «Krepaść», dzie prodki biełarusaŭ ujaŭlajuć saboju kalektyŭnuju pahrozu «Rusi» i vystaŭlajucca padstupnymi zachopnikami. I heta usio potym pakazvajecca ŭ biełaruskich kinateatrach! Naturalna, što ja svaich dziaciej na takuju stužku nie paviadu, ale ŭłady, vyhladaje, nie bačać pahrozy ŭ ideałahičnych manipulacyjach Maskvy. Tamu nie vyklučana, što paśla vychadu, hety «mulcik» pakažuć i ŭ nas», — miarkuje žurnalist.
