13 studzienia rasijskija ŚMI raspaŭsiudzili fejkavuju navinu pra maskoŭskaha supracoŭnika MUS, jakoha nibyta zhvałtavali prastytutki.
Pieršym pra zhvałtavańnie palicejskaha paviedamiŭ telekanał «360º Padmaskoŭje», u rasparadžeńni jakoha apynuŭsia «rapart» paciarpiełaha. U raparcie havorycca, što ŭ noč na 12 śniežnia jon adpraviŭsia ŭ pryton na «kantrolny zakup». Palicejski (dakładniej, staršakurśnik Univiersiteta MUS) nibyta zamoviŭ pasłuhu ŭ adnoj z prastytutak, zapłaciŭ hrošy, a zatym zajaviŭ, što jon źjaŭlajecca palicejskim.
«Dziaŭčyna pa imieni Volha pahladzieła na majo paśviedčańnie i skazała, što tam napisana «Univiersitet, słuchač», što ja nie supracoŭnik, a machlar», — napisana ŭ «raparcie». Paśla hetaha nibyta prastytutki ŭdaryli supracoŭnika rondalem pa hałavie, źviazali jaho i zhvałtavali straponam.
Natatku pieradrukavali bujnyja rasijskija ŚMI, a taksama niekatoryja biełaruskija.
Praź niekalki hadzin źjaviłasia pieršaje abviaržeńnie: ananimnaja krynica ŭ MUS zajaviła kanału RIEN TV, što zhadany dakumient — falšyŭka, stvoranaja ŭ krasaviku 2015 tavaryšami «paciarpiełaha» ŭ jakaści rozyhryšu.
«Hety małady čałaviek, jak ciapier pryniata kazać, «pravilny pacan», i kali b ź im sapraŭdy niešta padobnaje zdaryłasia, jon by pasaromieŭsia zajaŭlać pra heta», — zajaviła krynica. Jon taksama adznačyŭ, što kursanty MUS u pravieračnych zakupach nie ŭdzielničajuć.
U vyniku źjaviłasia i aficyjnaje abviaržeńnie ad HU MUS pa Maskvie. Tam zajavili: «Infarmacyja ŚMI ab zhvałtavanym prastytutkami palicejskim nie adpaviadaje rečaisnaści».