Damoŭlenaści pa źnižcy na rasijski haz dla Biełarusi ŭ 2016 hodzie niama, zajaviŭ 13 studzienia ŭ Maskvie namieśnik ministra enierhietyki Rasijskaj Fiederacyi Anatol Janoŭski. «Pakul nie damovilisia, novaj daty sustrečy niama», — skazaŭ jon nakont pieramoŭ, jakija viali vice-premjery Rasii i Biełarusi Arkadź Dvarkovič i Uładzimir Siamaška.
Pry hetym, pavodle infarmacyi TASS, Janoŭski dadaŭ, što razmova idzie ŭžo nie ab 10-pracentnym źnižeńni, jany pryjšli ź inšymi prapanovami — «absalutnymi ličbami».
Jak paviedamlaŭ BiełaPAN, 16 śniežnia vice-premjer Biełarusi Uładzimir Siamaška zajaviŭ, što bačyć «padstavy dla istotnaha źnižeńnia cany rasijskaha hazu z 1 studzienia» i što damovicca ab kankretnaj canie i padrychtavać adpaviednyja dakumienty baki płanujuć da 21 śniežnia. Pavodle infarmacyi Siamaški, ciapier cana za rasijski haz na miažy Biełarusi składaje 142 dalary 37 centaŭ za tysiaču kubamietraŭ.
18 śniežnia namieśnik ministra enierhietyki Biełarusi Vadzim Zakreŭski paviedamiŭ žurnalistam, što Minsk i Maskva praciahvajuć pieramovy ab źnižeńni ŭ 2016 hodzie cany na miažy za rasijski haz, jaki pastaŭlajecca ŭ Biełaruś. «Ciapier iduć abmierkavańni, kansultacyi z rasijskim bokam ab źnižeńni koštu hazu na miažy. Toje, što ŭ nas jość padstavy ab hetym havaryć, — heta fakt. Ja spadziajusia, źnižeńnie składzie kala $10 (za tysiaču kubamietraŭ), dzieści tak», — skazaŭ Zakreŭski.
20 śniežnia ŭ intervju telekanału ONT pasoł RF u Minsku Alaksandr Surykaŭ paviedamiŭ, što cana na haz dla Biełarusi ŭ 2016 hodzie moža skłaści ad 135 da 140 dalaraŭ za tysiaču kubamietraŭ. «U nas ceny na enierhanośbity dla Biełarusi, jak heta naležyć najbližejšym partnioram i partnioram pa Jeŭrazijskim ekanamičnym sajuzie, — unutryrasijskija, — padkreśliŭ pasoł. — Ja dumaju, što niejkija zruchi jašče mohuć być pa hazie, na niejkuju kolkaść dalaraŭ. <…> Ciapier 142 dalary za tysiaču kubamietraŭ. Moža akazacca ŭ rajonie ad 140 da 135 dalaraŭ. Ruch na suśvietnych rynkach idzie ŭniz. I pa nafcie mahčymy niejkija damoŭlenaści».
Jašče ŭ kancy listapada Uładzimir Siamaška nakont hetaha zajaŭlaŭ: «Ceny rezka ŭpali. Jość padstavy, kab abmiarkoŭvać, pa jakich cenach pavinna pastaŭlacca i kuplacca nafta. Stvorana rabočaja hrupa, jana pravodzić analiz. Tam pradstaŭniki «Łukojła», «Surhutniefciehaza», «Hazpromniefci» i «Rośniefci» i, naturalna, našaha «Biełnaftachima».
18 śniežnia pres-sakratar kancerna «Biełnaftachim» Maryna Kaściučenka paviedamiła, što Biełaruś i Rasija padpisali indykatyŭny bałans pastavak nafty i naftapraduktaŭ u 2016 hodzie, zhodna ź jakim Biełaruś atrymaje 24 młn. ton rasijskaj nafty, na 1 młn. ton bolš, čym u hetym. «Pastaŭki ŭ adkaz u Rasiju składuć 1 młn. ton biełaruskaha bienzinu», — skazała pradstaŭnik «Biełnaftachima». Pra canu pastavak nie paviedamlałasia.
