Biełarusist, vialiki siabra Biełarusi, kavaler Ordena Franciška Skaryny, hanarovy siabar Biełaruskaha PEN-centra Andžej Ciechanaviecki pamior u Łondanie na 92-m hodzie žyćcia.
Andžej Ciechanaviecki — vybitny navukoviec, naščadak kniazioŭ Mścisłaŭskich i Zasłaŭskich, biełarusist, historyk mastactva, miecenat, hramadska-kulturny dziejač, zasnavalnik Fundacyi Ciechanavieckich u Varšavie.
Naradziŭsia 28 vieraśnia 1924 hoda ŭ Varšavie. Vioŭ šyrokuju hramadska-dabračynnuju dziejnaść, maje šerah vysokich uznaharod. Aŭtar knihi «Michaił Kazimir Ahinski i jaho «siadziba muzaŭ» u Słonimie». Hanarovy staršynia polska-biełaruskaj kamisii pa spravach ahulnaj kulturnaj spadčyny, hanarovy maršałak Zhurtavańnia biełaruskaj šlachty, hanarovy siabar Mižnarodnaj asacyjacyi biełarusistaŭ i Instytuta biełaruskaj historyi Nacyjanalnaj akademii navuk Biełarusi. Vice-prezydent Anhła-biełaruskaha tavarystva ŭ Łondanie.
Andžej Ciechanaviecki padaravaŭ Biełarusi słucki pojas, redkija knihi i rarytety z radziviłaŭskaj kalekcyi, kłapaciŭsia pra pałac u vioscy Bačejkava Biešankovickaha rajona na Viciebščynie, dzie niekalki stahodździaŭ žyŭ jahony rod.
Pra niabožčyka ŭzhadvaje siabar Andžeja Ciechanavieckaha, prafiesar Adam Maldzis:
«Andžej Ciechanaviecki naradziŭsia ŭ siamji dypłamata ŭ Varšavie, ale ŭvieś čas ličyŭ svajoj druhoj histaryčnaj radzimaj Biełaruś. Tamu što byŭ naščadkam kniazioŭ Mścisłaŭskich i Zasłaŭskich. Usio svajo žyćcio Andžej pryśviačaŭ adradžeńniu histaryčnaj pamiaci.
Naša pieršaja sustreča ź Ciechanavieckim adbyłasia ŭ Łondanie ŭ časie majoj kamandziroŭki pa linii JUNESKA. Ja tady viedaŭ jaho jak aŭtara knižki pra Michała Kazimira Ahinskaha, dziadźku Michała Kleafasa Ahinskaha, jaki zasnavaŭ teatr u Słonimie. Ja pračytaŭ hetuju knihu, jakaja vyjšła ŭ Niamieččynie ŭ 1965 hodzie, napisaŭ recenziju na jaje, i naša sustreča ŭ Łondanie prajšła vielmi plonna — u vyniku Ciechanaviecki naviedaŭ Biełaruś, staŭ hanarovym prafiesaram BDU, hanarovym siabram Mižnarodnaj asacyjacyi biełarusistaŭ i hanarovym hramadzianinam horada Zasłaŭje. U vyniku našych sustreč jon praź mianie padaryŭ dla akademičnaha muzeja historyi kultury słucki pojas, vytkany pavodle słuckaha ŭzoru ŭ Lijonie.
Apošni jaho navukovy krok — heta dapamoha kalektyvu historykaŭ u vydańni knihi abjomam bolš za 700 staronak pra historyju rodu kniazioŭ Mścisłaŭskich i Zasłaŭskich. 20 ekziemplaraŭ hetaj knihi byli padoranyja biełaruskim biblijatekam.
Adychod Andžeja Ciechanavieckaha, jaki ŭšanavany ŭ mnohich krainach i jość hanarovym prafiesaram dziasiatkaŭ univiersitetaŭ pa ŭsim śviecie, — strata dla biełaruskaj navuki i kultury».
