Biełaruskaje telebačańnie nazvała proźvišča źnikłaj spartsmienki, jakuju šukaŭ Śledčy kamitet. Heta — Julija Bałykina, šmatrazovaja čempijonka Biełarusi pa lohkaj atletycy, udzielnica łondanskaj alimpijady.
Raniej upraŭleńnie Śledčaha kamiteta Biełarusi pa Minsku zajaviła, što šukaje žycharku Minska, jakaja pracavała treneram u BFST «Dynama» i źnikła 28 kastryčnika. SK paviedamiŭ, što zaviedziena kryminalnaja sprava ab zabojstvie.
«U śledstva jość abjektyŭnyja źviestki, jaki śviedčać pra kryminalny charaktar źniknieńnia žančyny. Padčas ahladu miesca žycharstva i aŭtamabila, jaki naležaŭ žančynie, znojdzienyja i zabranyja ślady, jakija razam z sabranymi materyjałami pakazvajuć na ździajśnieńnie zabojstva», — paviedamlaje SK. Z vykładzienaha na sajcie Śledčaha kamitetu videa vynikaje, što na aŭtamabili śledčyja znajšli adbitki palcaŭ i ślady kryvi.
Pavodle paviedamleńnia SK, užo zatrymany padazravany. Heta mužčyna 1987 hoda naradžeńnia, hramadzianin Rasii.
Viadoma, što pra źniknieńnie žančyny paviedamiŭ jaje znajomy 28 kastryčnika. Śviedka apavioŭ, što žančyna na svaim aŭtamabili pajechała da svajho doma i bolš na suviaź nie vychodziła.
***
Julija Bałykina naradziłasia ŭ 1984 hodzie ŭ Manholii, sportam pačała zajmacca ŭ 18 hadoŭ u Zaparožžy (Ukraina). U 2008 hodzie pierajechała ŭ Biełaruś. Vystupała na Alimpijadzie 2012 h. U Łondanie za kamandu Biełarusi. U 2013 hodzie była dyskvalifikavanaja na dva hady za ŭžyvańnie dopinhu (termin dyskvalifikacyi skončyŭsia sioleta ŭ lipieni). U apošni čas pracavała dziciačym treneram u BFST «Dynama».
