Biznesmien Uładzimir Japryncaŭ, najbližejšy biznes-partnior miljardera Juryja Čyža, aryštavany Kamitetam dziaržaŭnaj biaśpieki.
U rejtynhu samych paśpiachovych i upłyvovych biełaruskich biznesmienaŭ, składzienym «Ježiednievnikom» ŭ 2013 hodzie, Japryncaŭ zajmaŭ 19-je miesca.
Uładzimir Japryncaŭ. Fota combat-sambo.by.
«Naša Niva» ŭzhadvaje piać faktaŭ pra apalnaha biznesmiena.
Rasiejec z Turkmienistana
Japryncaŭ naradziŭsia ŭ 1961 hodzie ŭ Ašhabacie, stalicy Turkmienistana. Jahonyja baćki byli rasiejcami. U maładości jamu davodziłasia ŭdzielničać u bytavych kanfliktach rasiejcaŭ i turkmienaŭ, raskazvaŭ jon sam.
Jahony baćka rana kinuŭ siamju, kali chłopcu było dzieviać hadoŭ. Jaho vychoŭvała adna maci. Žančynie davodziłasia pracavać u troch miescach, kab prakarmicca.
Svaich baćkoŭ maci Japryncava nie pamiatała. Jana vyrasła ŭ dziciačym domie, dzie i atrymała svajo proźvišča — Valancina Nieviadomaja. Adpraviŭšysia na kamsamolskuju budoŭlu ŭ Turkmienskuju SSR, jana sustreła budučaha muža.
«Ciapier, ščyra kažučy, ad taho Ašchabada mała što zastałosia. Siońnia heta typovy turecki, nazaviem tak, horad. I kali ja zachaču ŭbačyć Turcyju, to pajedu ŭ krainu, jakaja była kaliści Asmanskaj impieryjaj… Dyj ad Rasiei kiraŭnictva Turkmienii advaročvajecca, ja ž — ruski čałaviek. I patryjot svajoj krainy — Biełarusi».
Japryncaŭ z nastalhijaj uzhadvaje pra Saviecki Cajuz i ličyć ZŠA «impieryjaj zła».
Čempijon pa samba
U Minsk Japryncava pryvioz trenier-biełarus, jaki pracavaŭ u Turkmienskaj SSSR. Chłopiec zajmaŭsia samba i pasprabavaŭ pastupić u Instytut fizkultury.
«Ekzamien pa chimii pravaliŭ, atrymaŭ zasłužanuju dvojku. Ja paśla toj hańby, kali z aŭdytoryi vyjšaŭ, pieražyŭ adzin z najmacniejšych stresaŭ ŭ žyćci. Ja sam byŭ vinavaty, pryjechaŭ jak pižon. Dumaŭ, mianie zaličać za vydatnyja spartyŭnyja pośpiechi. Praŭda, tak jano potym i vyjšła, dvojku vypravili na trojku», — uzhadvaŭ Japryncaŭ.
Uładzimir Japryncaŭ (źleva)
«Zasłužany majstar sportu SSSR pa samba, zasłužany trenier Biełarusi, 4-ch razovy čempijon śvietu pa samba, 3-ch razovy čempijon Jeŭropy pa samba, uładalnik Kubka śvietu», — hučyć śpis dasiahnieńniaŭ Japryncava.
Japryncaŭ staŭ apošnim čempijonam SSSR pa samba. Razvał dziaržavy adkryŭ pierad im novyja pierśpiektyvy.
Pieršyja hrošy zarabiŭ achoŭnikam
Japryncava paklikali vystupać u Hiermaniju. Siabry-pradprymalniki vyrašyli skarystacca jahonaj dapamohaj pry transparciroŭcy partyi likiora «Amareta» ŭ Maskvu. Spartoviec-čempijon byŭ achoŭnikam.
Na takoj ža pasadzie jon pracavaŭ i ŭ Juryja Čyža — supravadžaŭ hruz ź Minska ŭ Maskvu, achoŭvajučy jaho ad rekieciraŭ.
Z Čyžom jany paznajomilisia, hulajučy razam u futboł. Dapamahli bajcoŭskija suviazi — Čyž ŭ svoj čas paśpiachova zajmaŭsia hreka-rymskaj baraćboj.
Kaniec 1990-ch dyktavaŭ novyja formy pracy. Japryncaŭ staŭ zvacca načalnikam słužby biaśpieki «Trajpła».
A ŭ 2000-ja ŭźniaŭsia da statusa najbližejšaha partniora Juryja Čyža. Japryncava navat nazyvali suŭłaśnikam «Trajpła». Pry hetym jon abaraniŭ dysiertacyju doktara fiłasofskich navuk, jon suaŭtar knihi «Nacyjanalnaja samaśviadomaść jak intehratyŭnaja prykmieta nacyi».
Uładzimir Japryncaŭ (źleva), Juryj Čyž (sprava) i himnastka Ksienija Sankovič
(Były?) žychar Drazdoŭ
Jak i svoj bos, Japryncaŭ atrymaŭ mahčymaść pabudavać katedž u samym statusnym rajonie Biełarusi.
Admietna, što spačatku biznesmien uźvioŭ dom, i tolki paśla atrymaŭ va ŭłasnaść ziamlu (amal 11 sotak) pad im.
Dvuchpaviarchovy cahlany katedž płoščaj bolš za 450 m2 budavaŭsia na pazyčanyja hrošy. «Biełaruski narodny bank» adkryŭ Japryncavu kredytnuju liniju na $230 tysiač. Nieŭzabavie biznesmien paprasiŭ pašyryć jaje da $270 tysiač. Japryncaŭ mieŭsia viarnuć hrošy da kastryčnika 2015 hoda.
Mahčyma, vykanać svaje abaviazacielstvy jamu budzie składana. 17 žniŭnia katedž u Drazdach byŭ apiačatany. Padstavaj dla aryštu majomaści stała pastanova Kamiteta dziaržaŭnaj biaśpieki ad 12 žniŭnia 2015 hoda.
Syn-inviestar
Biznesam zajmajecca i syn Uładzimira Japryncava, Kaźbiek. Chłopiec atrymaŭ imia ŭ honar siabra baćki, treniera pa dziudo Kaźbieka Ramazanava.
Kaźbiek Japryncaŭ
Kampanija «Jamiks Hrup» Japryncava-małodšaha zajmałasia raskrutkaj internet-sajtaŭ. Naprykład, jamu naležyć futbolny sajt footballtop.ru, turystyčny partał, daviedkavy aŭtamabilny katałoh.
Jość u Japryncava i dźvie dački. Adna ź ich, Maryna, skončyła minski Linhvistyčny. Ciapier dziaŭčyna žyvie ŭ Vienie. Adnak mienavita na jaje zarehistravanyja trochpakajovyja apartamienty Japryncavych u «domie Čyža» ŭ Trajeckim pradmieści. Heta i ŭratavała kvateru ad aryštu śpiecsłužb.
Maryna Japryncava.
