Pamior litaraturaznaŭca Uładzimir Sodal

Kala pomnika Kupału.

Biełaruski litaraturaznaŭca Uładzimir Sodal pamior viečaram 15 krasavika. Jamu było 78 hadoŭ.

Sp. Uładzimir apošnim časam ciažka chvareŭ, jaho špitalizavali z prablemami nyrak, dadaŭsia cukrovy dyjabiet i infarkt.

Raźvitańnie z Uładzimiram Sodalem projdzie 18 krasavika (subota) ad 11 da 13 hadziny ŭ rytualnaj zale pry haradskoj kliničnaj balnicy №9 (vuł.Siamaška,8).

Uładzimir Sodal daśledavaŭ tvorčaść Franciška Bahuševiča, V. Dunina-Marcinkieviča, Ja. Kupały, Zośki Vieras. Jon byŭ šmathadovym aŭtaram «Našaj Nivy», daśledčykam bijahrafij jaje zasnavalnikaŭ — Alaksandra Ułasava, Janki Kupały, Branisłava Taraškieviča, Jazepa Drazdoviča.

Šlach jaho da Biełaruščyny byŭ pakručastym. Paśla zakančeńnia Mormalskaj biełaruskaj siaredniaj škoły U.Sodal pracavaŭ elektrykam u Murmansku (Rasija) na sudnaramontnym vajennym zavodzie. Paśla vučyŭsia ŭ Minskim dziaržaŭnym piedahahičnym instytucie imia Maksima Horkaha, pracavaŭ piedahoham u dziciačym tubierkuloznym sanatoryi «Astrašycki haradok» i redaktaram Biełaruskaha telebačańnia, dzie ŭznačalvaŭ studyju «Licej» i byŭ adnym z zasnavalnikaŭ navučalnaha telebačańnia. Za 34 hady pracy na BT padrychtavaŭ šerah aśvietnickich prahram, u tym liku «U kožnaha była svaja vajna».

Pieršyja svaje apaviadańni U.Sodal apublikavaŭ u 1955 hodzie ŭ haziecie «Pijanier Biełarusi». Źjaŭlajecca aŭtaram šerahu knih i dyjafilmaŭ pra kłasikaŭ biełaruskaj litaratury Franciška Bahuševiča i Vincenta Dunina-Marcinkieviča, pra nacyjanalnaha hieroja Biełarusi Kastusia Kalinoŭskaha.

Pachavajuć piśmieńnika i litaraturaznaŭca na mohiłkach u Astrašyckim haradku, kala maci.

U junactvie.

Ź Siarhiejem Paniźnikam, Volhaj Ipatavaj i Vitalom Skałabanam u Zośki Vieras u Vilni.

Ź Mikołam Jermałovičam.

Ź Mikałajem Ułaščykam.

Ź Michasiom Čarniaŭskim.

U ekśpiedycyi.

Z Hienadziem Buraŭkinym.

Z unukam.

Čytajcie taksama:

Uładzimir Sodal. Puńki. Radzima Drazdoviča

Uładzimir Sodal. Vanda ŭ Kupalichi