Kali pahladzieć na niadaŭna znojdzienyja videa minskaha rok-kłubu, robicca troški sumna: «Takuju «Mroju» zhubili, znatna ž hrukatali»! Dy «Mroja» źnikła nie kančatkova — jana pieraradziłasia jak «Niezaležnaja Respublika Mroja», albo dobra viadomy i siońnia N.R.M.
Taki los niaredki: naprykład, kolišnija chedłajniery biełaruskaha hrandžu «Krok» pieraradzilisia (chaj sa značnymi źmienami, ale źmienami nie ŭ horšy bok) u Avias. Gods Tower, što zdavaŭsia nazaŭsiody stračanym praź śmierć hitarysta Alaksandra Urakova, adradziŭsia pad toj ža nazvaj i z muzykaj starych časoŭ. Asabista ja sumavaŭ pa «Abšary» — ciapier z asałodaj słuchaju Haina, novy prajekt eks-lidara «Abšaru». Zamiest adnoha «Lapisa» słuchačy atrymali Trubetskoy i Brutto.
Ale jašče jość hurty, jakija zmoŭkli raniej, čym taho chaciełasia. Jakija mahli b syhrać jašče dva tuziny chitoŭ i «rvać zały» navat siońnia.
Nižej ja nazavu 10 takich hurtoŭ, ale prašu zaŭvažyć: to moj asabisty top, u jaki nie trapiła bahata inšych hurtoŭ. Viedajecie inšych, chto zmoŭknuŭ zarana? Raspaviadzicie pra ich u kamientarach!
Mauzer
«Dy ty nie maješ prava!» — prykładna takoj była maja reakcyja na navinu ab tym, što lidar Mauzer sychodzić z muzyki. Kali nie Mauzer, to što słuchać 15-hadovym, pakryŭdžanym na pierachodny ŭzrost? Tokio Hotel? Pff, śmiešna. Mauzer i pahłybiej, i pamiłahučniej. Byŭ. Hurt faktyčna raspaŭsia napiaredadni prezientacyi albomu, potym Janka kazaŭ ab mahčymaści novaha składu hurta, ale… Asabliva kryŭdna, bo pierad raspadam hurt vydaŭ albom «Porna», u jakim raskryŭsia šykoŭny vakał Janki Maŭziera, a teksty stali šmathrannymi i jašče bolš… hchm… «pikantnymi». Dy i płytka była zapisanaja tak, što zdavałasia, niby hukarežysior varažyŭ nad pultam, jak varožyć na scenie Ivan Kirčuk z «Troicaj». Na novy Mauzer byŭ problisk nadziei, kali Janka anansavaŭ novy prajekt «MAMA», ale z tym prajektam była zapisanaja tolki adna — chaj vydatnaja, ale tolki adna pieśnia (mp3 na sajcie Tuzin.fm).
Termin-X
Napraŭdu dobraha pop-roku ŭ Biełarusi niebahata, jašče mieniej jaho pa-biełarusku. Tamu nadzvyčaj cikavym vyhladaŭ hurt Termin-X — hučańnie nie napružvaje amal lubuju aŭdytoryju, a teksty zakranajuć cikavyja temy (ad ekałohii da advahi snoŭbardystaŭ). Takaja muzyka moža nie zachapić usie radyjostancyi, peŭna, tolki ŭ Biełarusi (chacia raz-poraz na radyjo jany traplali). Zasnavany ŭ 2005-m, hurt raspaŭsia ŭ 2007-m, potym znoŭ sabraŭsia ŭ 2009-m, kab vydać adziny svoj albom, a zatym znoŭ raspaścisia ŭ 2011-m — i ŭžo kančatkova. U 2014-m hurt vydaŭ apošni trek — remiks pieśni «Radyjo-radyjo» ŭ pamiać ab minskaj śvieckaj lvicy Eleanory Jazierskaj.
Tarpach
Historyja Tarpach skončyłasia trahična — śmierciu vakalistki Volhi Samusik u 2010 hodzie. Za 25 hod śpiavačka i žurnalistka paśpieła ŭziać udzieł u zygimontVAZA i Hasta la Fillsta, vystupić poruč z chiba nie kožnym značnym biełaruskim rokieram, atrymać tytuł «Rok-kniazioŭny»… Samym cikavym prajektam ź jaje ŭdziełam ja by nazvaŭ Tarpach. Chacia prajekt nazyvali «biełaruskamoŭnym Arch Enemy», Tarpach moh by atrymać papularnaść, šyrejšuju za mietał-scenu, ad hurta nie raźbiahalisia na «cichich-mirnych» rok-fiestyvalach. A papužać maleńkich dziaŭčat klipam «Lublu ludziej» možna bieź vialikaj ryzyki dla ich psichičnaha zdaroŭja. Ale, na žal, Tarpach z Volhaj nie paśpieli zapisać nivodnaha alboma — tolki paru trekaŭ.
Uspliosk
Zaviaršeńnie dziejnaści hurta adpaviadała naźvie — byŭ usplosk i ŭsio, niama. Musiŭ u tym ža 2010-m transfarmavacca ŭ aŭdyjovizualny prajekt — dy niedatransfarmavaŭsia. Dy lepiej by nie sprabavaŭ, bo Uspliosk zastajecca ŭnikalnym prynamsi dla Biełarusi. Dla niepadrychtavanaha słuchača ich muzyka chutčej budzie hučać jak toje, što sprabujuć vydać za aŭdyjonarkotyki (adnosna apošnich — malu, paškadujcie vušy). Ale kali paabvyknuć, «raspłyvacca» razam ź ich muzykaj davoli pryjemna. Było b pabolej za dva albomy…
Indiga
Seks-simvałam biełaruskaj sceny dla mianie była i jość Rusia. Siońnia ź joj usio dobra, jana maje najcikaviejšy prajekt Šuma na miažy neafolku, tryp-chopu i mnoha čaho jašče. Ale rok-hurt Indiga, u składzie jakoha Rusia stała «Rok-kniazioŭnaj», ścichnuŭ u 2006 hodzie. Rusia kaža, usio praz «Płošču». Ab eratyčnych (u prystojnym sensie) tancach Rusi pad hrukat «Troch soncaŭ» zastalisia adno ŭspaminy. Adziny albom dy jašče para zapisanych trekaŭ zasłuchanyja da dzir. Pa zahadkavy, chałodny, siurrealistyčny rok z žanočym vakałam prychodzicca chadzić da susiedziaŭ — vuń va ŭkraincaŭ jość «Krichitka». A ŭ nas novaj Indiga nie źjaviłasia.
Hluki
Zdavałasia b, pankaŭ na biełaruskaj scenie chapaje. Ale kali nie stała «Hlukaŭ», u peŭnym siehmiencie nadyšła cišynia. Nasamreč, «Hluki» zaŭvažna evalucyjanavali — u druhim albomie (jaki hurt vydaŭ užo paśla raspadu, u 2009 hodzie) jany ŭžo niečym nahadvali Akute, u jakim siońnia hrajuć zasnavalniki «Hlukaŭ». Dy Akute — zusim nie tyja razbaściajskija panki, jakimi byli «Hluki». A adzin ci dva albomy — tut roźnica nievialikaja, bo ŭ takich hurtoŭ, jakim byli «Hluki» časoŭ pieršaha albomu, niaredka nabirajecca prystojnaja vializnaja dyskahrafija i armija chulihanistych raźviasiołych fanataŭ.
Band A
Ścipłyja intelehientnyja Cmokie z časam pieratvarylisia ŭ miescami bolej ramantyčnych, a miescami bolš cyničnych Band A, zdabyŭšy žanočy vakał. Samaja viadomaja ich pieśnia, «Revalucyja», była, peŭna, samaj nietypovaj dla hurtu. Płytka «Pazityvy» u płejliście była dobrym susiedam Foo Fighters, ale ŭ apošnich Band A naŭrad ci «śpisvaŭ». Na žal, u hurta było nie tolki mała zapisaŭ, ale i niašmat vystupaŭ — paśla 2009 hoda mała chto ich uzhadvaŭ. Darma, bo z tych časoŭ nichto ŭ Biełarusi padobnaha nie hraŭ.
Novaje Nieba
Pa praŭdzie, «Novaje Nieba» my nie hublali. U Kasi Kamockaj chapaje zapisaŭ i solnych, i z hurtom. Nielha skazać, što jaje zabyli — na svaich redkich vystupach jana źbiraje natoŭp i starych, i maładych fanataŭ. Ale hraje jana akustyku. A voś elektryčnaje «Novaje Nieba» ŭzoru albomu «Cepieliny» 1999 hoda zarana syšło ŭ niabyt. Mo ŭ toj čas niaprostyja teksty i niezvyčajny hołas Kasi ŭ kambinacyi ź ciažkimi ryfami byli nadta «mozhavynosnaj» sumieśsiu. Navat siońnia nie kožny da kanca dahladzić stympankavyja «Cepieliny». Ale kali dahladzić, budzie da kanca žyćcia škadavać, što elektryčnaje «Novaje Nieba» nie atrymała raźvićcia.
Miascovy čas
Ścieražysia, niedzie pobač pralataje Žalezny čałaviek! Heta ž sapraŭdny AC/DC! Tolki pa-biełarusku i z chryścijanskimi matyvami. I heta ŭsio na miažy 80-ch i 90-ch. Mahli b, jak tyja AC/DC, i siońnia žvava skakać pa scenie dy zapisvać druhi dziasiatak albomaŭ, ale raspalisia ŭ 1992 hodzie. U 1997-m uźjadnalisia, kab znoŭ raspaścisia ŭ 2001-m, kali ich šalony hołas, Aleś Kuźmin źjechaŭ u Niamieččynu. Biełaruś zastałasia biez aŭstralijskaha rok-n-rołu.
Ulis
«Zasłužany vandroŭnik Biełarusi», jak niekali nazyvali Ulis, chiba nie rekardsmien pa źmienach u kalektyvie. A taksama rekardsmien pa «nu čamu my ich zhubili».
«Ciahnik na Niaśviž» — mp3 na sajcie Ulis.by
Pieršyja try albomy hurta («Čužanica», «Kraina doŭhaj biełaj chmary» i «Tancy na dachu») prademanstravali na miažy 80-ch i 90-ch, što biełarusy mohuć zapisvać składanuju, mahutnuju i miłahučnuju muzyku vyšejšaha hatunku. Kłasičny rok ź vialikaj litary. Taki nie soramna zakinuć u adzin płejlist z zamiežnymi hihantami nakštałt Pink Floyd i Led Zeppelin. Zapisać tolki try takija albomy, a nie tryccać, — chiba to nie złačynstva?
«Bieh na miescy» — mp3 na sajcie Ulis.by
Dy ničoha, Ulis adradziŭsia i ŭ siaredzinie 90-ch staŭ hrać niešta zusim inšaje, amal hrandž. Šyrokaha raspaŭsiudu tyja albomy nie atrymali, a musili b! Siońnia vielmi brakuje takich piesień jak «Bieh na miescy», «Pieršy śnieh» albo «Pa-nad dachami». Praciahni isnavać toj Ulis — mo siońnia my b mieli taki kruty hrandž z napłyvam art-roku, što pałova śvietu abzajzdrościłasia b. A Ulis vaźmi i nie praciahni. Čatyry kasiety, pieśni ź jakich u mp3 znojdzieš u redkaha biełarusa — i jašče adna źmiena stylu.
Ulis «nulavych» — askietyčnaje mietalovaje «rubiłava». Adziny albom «Lusterka» iznoŭ prajšoŭ amal mima publiki. Mahčyma, jon prosta vyjšaŭ na hod 10 raniej, čym musiŭ by. «Zvarjacieły tancor» dobra słuchaŭsia b u halivudskim bajeviku, a «Padmohi» na vierš Karatkieviča natchniaŭ by nie horš (tolki paciažej) za lapisaŭski «Hraj». Ale Ulis u takim styli zapisaŭ tolki adnu płytku, vystupaŭ niačasta i prypyniŭ kancertnuju dziejnaść u rajonie 2009 hoda. A mieŭ patencyjał stać fłahmanam ciažkoj sceny.
***
P.S. Farmalna Vicious Crusade, kolišnija chedłajniery mietał-sceny i aŭtary «Ajčyny», nie raspadalisia, ale pa 2011-m ad ich nie było navin. Tryvožna. Apošniaj ich pieśniaj była «Losers' song» — niahoža na takoj nocie zavieršvać karjeru. Z taho ž hoda nie čuvać pra Partyzone, aŭtaraŭ mahutnaj «Śmierci niama». UltraVožyk? Mo pačujem jašče adnu «Atłantydu»? A što Osimira? Kažuć, niby nie raspalisia, ale niešta maŭčać. Čamuści bahata takich prykładaŭ «paŭraspadu».
***
Mierkavańnie aŭtara moža nie supadać ź mierkavańniem redakcyi i zhadanych hurtoŭ.
Čytajcie taksama:
Top-21 biełaruskich piesień XXI stahodździa >>>
