Zajava Jeŭrasajuza z asudžeńniem abstrełu bajevikami Maryupala źjaviłasia ŭ aŭtorak, 27 studzienia, uranku. A ŭviečary ŭrad Hrecyi vydaŭ kamunikat, u jakim admiežavaŭsia ad dadzienaj zajavy.
U im havorycca: «Dadzienaja zajava źjaviłasia ŭ abychod naležnaj pracedury, zhodna ź jakoj pavinna być atrymanaja zhoda ŭsich krain i, u pryvatnaści, nie była atrymanaja zhoda Hrecyi».
«U takim kantekście Hrecyja nie pahadžajecca na dadzienuju zajavu».
Zajavu rychtavaŭ ofis Donalda Tuska.
Vyniki vybaraŭ u Hrecyi byli abvieščanyja ŭ paniadziełak, a ŭrad byŭ sfarmavany ŭ aŭtorak. Heta dało padstavu dypłamatyčnamu pradstaŭnictvu Hrecyi ŭ ES pasprabavać razradzić situacyju, patłumačyŭšy, što nieparazumieńnie było źviazanaje prosta ź pieradačaj ułady ŭ Afinach.
Učora Cypras razmaŭlaŭ z kaardynatarkaj jeŭrapiejskaj dypłamatyi Fiederykaj Mahieryni.
Jak paviedamlaje infarmavanaje bruselskaje vydańnie euobserver.com, hreki sprabavali vydalić z zajavy radok, jakim adkaznaść za bambavańnie ŭskładałasia na Rasiju. «Razmyć zajavu taksama sprabavali Aŭstryja, Vienhryja i Słavaččyna, — piša sajt. — Ale im nie ŭdałosia».
U vyniku da zajavy dadali spasyłku pra asablivuju pazicyju Hrecyi.
U Jeŭrasajuzie rašeńni prymajucca kansensusam. Tamu radykalna levy ŭrad Hrecyi zmoža błakavać lubyja rašeńni ES, skiravanyja na strymlivańnie rasijskaha nastupu va Ukrainie ci na abaronu pravoŭ čałavieka ŭ Biełarusi.
U Jeŭraparłamiencie Siryza ŭvachodzić u jeŭrapiejski błok «Jeŭrapiejskija levyja». Lidar Siryza Aleksis Cypras navat byŭ kandydatam ad hetaha zhurtavańnia na pasadu kiraŭnika Jeŭrakamisii. A Jeŭrapiejskija levyja tradycyjna vystupajuć suprać sankcyj da Rasii za jaje ahresiju va Ukrainie. Jany ŭskładajuć vinu za padziei ŭ Krymie i Danbasie na centralny ŭrad Ukrainy.
Taksama levyja hałasavali suprać abmiežavalnych mieraŭ u dačynieńni da łukašenkaŭcaŭ za parušeńni pravoŭ čałavieka ŭ Biełarusi. Hałoŭny vorah dla jeŭrapiejskaj radykalnaj lavicy — heta ZŠA i pravyja siły ŭ Jeŭropie. U zmahańni ź imi jany hatovyja jadnacca navat z dyktatarami. Čaves — kumir jeŭrapiejskich levych, a Pucin — nadzieja na źmienu status-kvo na suśvietnaj palityčnaj arenie. Niekatoryja z palityčnych siłaŭ, što ŭtvaryli Siryzu, atrymlivali finansavańnie z Maskvy jašče ŭ savieckija časy.
Palitołahi nie dajuć rady pradkazać, jak buduć razhortvacca padziei paśla pieramohi Siryzy. U palityčnych kołach Hiermanii nie vyklučali varyjantu vychadu Hrecyi ź jeŭrazony i Jeŭrasajuza ŭvohule — pieršy taki vypadak u historyi ES.
Bolšaść analitykaŭ u samoj Hrecyi dapuskajuć, što paśla prychodu da ŭłady Siryza nie budzie vykonvać bolšaści pieradvybarnych abiacańniaŭ i praciahnie vykanańnie patrabavańniaŭ mižnarodnych kredytoraŭ, kab utrymacca ŭ jeŭrazonie. Dźvie traciny hrekaŭ chočuć zachavańnia jeŭra. Hałasavańnie za Siryzu — pratestnaje pa svaim charaktary.
Kamunisty i radykały ŭvachodzili va ŭradavyja kaalicyi ŭ jeŭrapiejskich krainach i raniej. Heta zdarałasia ŭ Francyi pry Fransua Miteranu, u Italii ŭ 1990—2000-ja. Heta nie pryviało da dezintehracyi ES, ale nakładvała adbitak na palityku sajuza. Roźnica ŭ tym, što Siryza — samaja radykalnaja palityčnaja siła, jakaja kali-kolviek prychodziła da ŭłady ŭ krainie ES. Akramia taho, Hrecyja — pravasłaŭnaja kraina, a asłableńnia Jeŭrasajuza dabivajecca Kreml.
Varta adznačyć, što skład urada Cyprasa daje nadzieju, što Hrecyja zachavaje prajeŭrapiejski vybar. Klučavyja pasady ŭ MZS, Minfinie i Minabarony zaniali prajeŭrapiejskija dziejačy.
