Nabyŭ moc pryhavor sudovaj kalehii pa kryminalnych spravach Mahiloŭskaha abłasnoha suda ŭ dačynieńni da 28-hadovaha žychara Hłuskaha rajona.
Jon asudžany za ŭčynieńnie zabojstva z asablivaj žorstkaściu dźviuch asob, u tym liku zaviedama małaletniaha, jaki znachodziŭsia ŭ biezdapamožnym stanie (pp.1, 2, 6 č. 2 art. 139 KK), i śviadomaje pakidańnie ŭ niebiaśpiecy, učynienaje asobaj, jakaja sama z uskosnym namieram pastaviła paciarpiełaha ŭ niebiaśpiečny dla žyćcia i zdaroŭja stan (č. 3 art. 159 KK).
Jak paviedamiła staršy pamočnik prakurora Mahiloŭskaj vobłaści Ała Kuźniacova, u vieraśni 2013 hoda abvinavačany pryjšoŭ da svajoj sužycielki ŭ dom, raźmieščany ŭ Hłusku, dzie jana znachodziłasia z małaletnimi dziećmi: synam 2011 hoda naradžeńnia i trochmiesiačnaj dačkoj. Padčas svarki z žančynaj na hlebie ŭstanaŭleńnia jaho baćkoŭstva ŭ dačynieńni da dziaŭčynki jon, nie ličačy siabie baćkam dziciaci, pačaŭ žorstka źbivać žančynu, jakaja trymała na rukach dzicia, kułakami i adviortkaj. Jana ŭpała na padłohu i straciła prytomnaść.
«Praciahvajučy supraćpraŭnyja dziejańni, skiravanyja na pazbaŭleńnie jaje žyćcia, źviazaŭ nohi paciarpiełaj i šyju viaroŭkaj, źmiaściŭ cieła žančyny ŭ miašok z materyi. Zatym abmataŭ hałavu małaletniaha dziciaci dziciačaj cyrataj, zamacavaŭšy jaje viaroŭkaj na šyi, i pakłaŭ dzicia ŭ miašok razam z maci. Pahruziŭšy miašok ź ciełami achviar u bahažnik aŭtamabila, vyviez i zakapaŭ kala budynka niepracoŭnaj fiermy», — raskazała pradstaŭnik prakuratury.
Zhodna z zaklučeńniem sudova-miedycynskaj ekśpiertyzy žančyna ŭ momant pachavańnia była žyvaja. Jaje śmierć nastupiła paźniej u vyniku aśfiksii ad ściskańnia hrudziej i žyvata. Śmierć dziciaci nastupiła ŭ vyniku aśfiksii ad niedachopu kisłarodu.
Žorstka raspraviŭšysia z hramadzianskaj žonkaj i trochmiesiačnym dziciem, złamyśnik pakinuŭ u domie biez nahladu, dohladu, charčavańnia svajho trochhadovaha syna, jakoha znajšli amal praz sutki. Pry naradžeńni chłopčyka abvinavačany taksama admaŭlaŭsia pryznać jaho svaim synam i tolki praz hod pryznaŭ hety fakt.
Padčas papiaredniaha rasśledavańnia abvinavačany admaŭlaŭ svajo dačynieńnie da złačynstvaŭ, adnak padčas rasśledavańnia i sudovaha razboru jaho vina va ŭčynienych złačynstvach była poŭnaściu dakazanaja.
Sud, pahadziŭšysia z pazicyjaj dziaržaŭnaha abvinavaŭcy, pryznačyŭ mužčynu ŭ jakaści pakarańnia pažyćciovaje źniavoleńnie z adbyvańniem u papraŭčaj kałonii va ŭmovach asablivaha režymu. Ź jaho spahnanyja 250 młn. rubloŭ na karyść maci zabitaj im žančyny ŭ lik kampiensacyi maralnaha ŭronu.
Viarchoŭnym sudom razhledžanaja kasacyjnaja skarha asudžanaha. Pryhavor sudovaj kalehii pa kryminalnych spravach Mahiloŭskaha abłasnoha pakinuty ŭ sile.
