Rasijskaja dziaržaŭnaja naftavaja kampanija «Rośniefť» zaklučyła pahadnieńni z narviežskaj i šviejcarskaj kampanijami. Takim čynam jana abyšła sankcyi ES, jakija zabaraniajuć pastaŭki technałohij i abstalavańnia dla hłybakavodnaj zdabyčy nafty, u tym liku na Arktyčnym šelfie.
U pačatku žniŭnia 2014 «Rośniefť» kupiła dolu ŭ adnoj z najbujniejšych u śviecie naftasiervisnych kampanij-padradčykaŭ — šviejcarskaj Weatherford, paviedamili ŭ pres-słužbie kampanii.
Pavodle damovy, rasijski bok atrymaŭ vosiem strukturnych padraździaleńniaŭ, jakija zajmajucca bureńniem i ramontam śvidravin u Rasii i Vieniesuele.
Baki taksama damovilisia ab doŭhaterminovym supracoŭnictvie ŭ halinie naftasiervisnych pasłuh. Suma ŭhody nie nazyvajecca. Adnak, jak stała viadoma z rašeńnia Rady dyrektaraŭ rasijskaj kampanii ad 28 lipienia, «Rośniefť» zapłaciła nie bolš za $ 398,3 młn za šviejcarskija aktyvy.
«Rośniefť» taksama padpisała doŭhaterminovaje pahadnieńnie pa bureńni marskich śvidravin z narviežskaj kampanijaj North Atlantic Drilling Ltd. Pahadnieńnie ŭklučaje ŭ siabie vykarystańnie da 2022 hoda šaści marskich buravych ustanovak dla zdabyčy na šelfie, u tym liku va ŭmovach Arktyki.
Na minułym tydni Jeŭrapiejski Sajuz zabaraniŭ pastaŭki technałohij dla hłybakavodnaha bureńnia naftavych śvidravin u Rasiju, praz što vialikija prajekty «Rośniefti» na šelfie apynulisia pad pahrozaj.
Adnak kantrakty z narviežskaj i šviejcarskaj kampanijami dazvolać Rasiei abyści hetyja abmiežavańni.
Treba adznačyć, što Narviehija, jak praviła, uvodzić sankcyi simietryčna ź ES, tady jak Šviejcaryja dekłaravała, što nie budzie dałučacca da siektaralnych ekanamičnych sankcyj. A taksama što ŭ vypadku sistemnych parušeńniaŭ praz pasiarednika ES tearetyčna moža źmianić umovy sankcyj takim čynam, kab spynić dadzieny kanał pastaŭki ŭ RF zabaronienaha abstalavańnia.
