Jeŭrazijski ekanamičny sajuz (JEAES) nie niasie nijakaha ŭronu suvierenitetu Biełarusi. Takoje mierkavańnie vykazaŭ namieśnik staršyni Libieralna-demakratyčnaj partyi (ŁDP) Aleh Hajdukievič, vystupajučy na pasiadžeńni kruhłaha stała «Jeŭrazijski sajuz: prablemy stanaŭleńnia i pierśpiektyvy raźvićcia» ŭ Minsku 11 lipienia.
«Asnoŭny paprok da jeŭrazijskaj intehracyi ŭ tym, što Biełaruś stracić svoj suvierenitet. Naturalna, 99% biełaruskaha nasielnictva nikoli nie padtrymajuć zdaču suvierenitetu — heta śviatoje», — zaŭvažyŭ Hajdukievič.
Na dumku palityka, nijakaha ŭronu suvierenitetu Biełarusi niama: «U čym my skavanyja? Nacyjanalnaja valuta svaja, palityčnaja pazicyja svaja. Ekanomiku nam pieraškadžajuć madernizavać? Nie, nichto nam nie pieraškadžaje».
Pavodle słoŭ Hajdukieviča, Jeŭrasajuz u bolšaj stupieni ŭščamlaje suvierenitet krain, jakija ŭ jaho ŭvachodziać. «Jeŭrapiejskija palityčnyja siły havorać, što nacyjanalnyja valuty treba viartać, što suvierenitet treba viartać», — skazaŭ namieśnik staršyni ŁDP, dadaŭšy, što takoje mierkavańnie skłałasia ŭ jaho paśla pajezdak pa roznych krainach ES i sustreč ź jeŭrapiejskimi palitykami.
Hajdukievič taksama ličyć, što padpisany dahavor ab JEAES nie addalaje Biełaruś ad Jeŭropy, a nabližaje krainu da jaje. «Razam Biełaruś, Rasija i Kazachstan, inšyja krainy, jakija chočuć dałučycca da abjadnańnia, — my razam damovimsia ź Jeŭrapiejskim sajuzam, tamu što heta budzie siła, ź jakoj jany buduć vymušanyja ličycca», — miarkuje jon.
Pry hetym palityk adznačyŭ: «Naša partyja vielmi niezadavolenaja tym, jak adstojvajucca nacyjanalnyja intaresy Biełarusi paśla padpisańnia ŭsich pahadnieńniaŭ (pa stvareńni JEAES). Bolš žorstka treba ich adstojvać, heta narmalna: Kazachstan i Rasija žorstka heta robiać».
Hajdukievič prapanavaŭ pryciahvać bujny i siaredni biźnies da vypracoŭki pazicyi Biełarusi ŭ pieramovach z partniorami pa JEAES. Jon taksama ličyć, što dla zachavańnia suvierenitetu Biełarusi nieabchodna «raścić nacyjanalnuju elitu, pravodzić reformy, raźvivać hramadzianskuju supolnaść i palityčnyja partyi».
Namieśnik staršyni partyi paviedamiŭ, što ŁDP inicyjuje praviadzieńnie ŭ Minsku «kanhresu patryjatyčnych partyj Jeŭropy».
Kruhły stoł «Jeŭrazijski sajuz: prablemy stanaŭleńnia i pierśpiektyvy raźvićcia» arhanizavany infarmacyjna-aśvietnaj ustanovaj «Aktualnaja kancepcyja» pry padtrymcy pasolstva RF u Biełarusi. Akramia ekśpiertaŭ ź Biełarusi, Rasii i Armienii na mierapryjemstvie prysutničali pradstaŭniki dypłamatyčnych misij Rasii, Kazachstana, Tadžykistana i Jeŭrapiejskaha sajuza.
