Były deputat Pałaty pradstaŭnikoŭ, siabra Biełaruskaj sacyjał-demakratyčnaj partyi (Hramada) hienierał Valeryj Frałoŭ vyrašyŭ vyłučyć svaju kandydaturu na vybarach prezidenta ŭ 2015 hodzie.
Pra heta palityk paviedamiŭ BiełaPAN.
Frałoŭ adznačyŭ, što jon źjaŭlajecca prychilnikam vyłučeńnia adzinaha kandydata «nie tolki ad apazicyi», i budzie hatovy źniacca na karyść bolš papularnaha pretendenta. «Adziny kandydat — heta nie panaceja. Daj boh, kab takoje zdaryłasia, ale ja ŭ heta słaba vieru», — skazaŭ jon.
Na dumku palityka, lepšaj pieradvybarčaj stratehijaj było b vyłučeńnie niekalkich kandydataŭ, «kampietentnych u roznych śfierach». «A potym napiaredadni vybaraŭ pahladzieć na rejtynhi, źniacca na karyść hetaha čałavieka (z najvyšejšym rejtynham), Zaprasić svaich prychilnikaŭ prahałasavać za jaho i takim čynam vyjści na realnaha adzinaha», — dadaŭ Frałoŭ.
Palityk padkreśliŭ, što płanuje abapiracca pierš za ŭsio na padtrymku aficeraŭ i intelihiencyi. Akramia taho, jon pierakanany, što atrymaje padtrymku svajoj partyi.
Valeryj Frałoŭ užo vyłučaŭsia ŭ prezidenty ŭ 2006 hodzie, ale zmoh sabrać krychu bolš za 58 tysiač podpisaŭ pry nieabchodnych dla rehistracyi 100 tysiačach. Sam Frałoŭ patłumačyŭ heta niedachopam finansavańnia. Tady palityk padtrymaŭ kandydata ŭ prezidenty ad svajoj partyi Alaksandra Kazulina.