29 listapada Papa Francišak pryznačyŭ troch novych biskupaŭ u Biełarusi: ks. Aleha Butkieviča biskupam Viciebskaj dyjacezii, ks. Juryja Kasabuckaha dapamožnym biskupam Minska-Mahiloŭskaj archidyjacezii, ks. Iosifa Stanieŭskaha dapamožnym biskupam Hrodzienskaj dyjacezii.
Aleh Butkievič naradziŭsia 18 sakavika 1972 h. u Brasłavie, na terytoryi sučasnaj Viciebskaj dyjacezii. Pierad pastupleńniem u Vyšejšuju duchoŭnuju sieminaryju ŭ Hrodnie (1994 h.) skončyŭ Biełaruski dziaržaŭny ahrarny techničny ŭniviersitet.
Preźbiterskaje paśviačeńnie pryniaŭ 13 maja 2000 h.; źjaŭlajecca preźbiteram Viciebskaj dyjacezii. Vykonvaŭ abaviazki vikaryja parafii ŭ Navapołacku i Mijorach, abaviazki probašča parafii ŭ Biešankovičach i Ule. Z 2003 h. vykonvaje abaviazki probašča parafii Sv. Antonija Paduanskaha ŭ Viciebsku i dekana dekanatu Viciebsk-paŭnočny.
Cikava, što ŭ biskupa Butkieviča jość dźvie siastry — abiedźvie manaški-eŭcharystki.
Juryj Kasabucki naradziŭsia 15 lutaha 1970 h. u Maładziečnie na terytoryi sučasnaj Minska-Mahiloŭskaj archidyjacezii. Pierad pastupleńniem u Vyšejšuju duchoŭnuju sieminaryju ŭ Hrodnie (1991 h.) vučyŭsia ŭ Biełaruskim dziaržaŭnym instytucie narodnaj haspadarki i adbyŭ vajskovuju słužbu.
Preźbiterskaje paśviačeńnie pryniaŭ 7 śniežnia 1996 h.; źjaŭlajecca preźbiteram Minska-Mahiloŭskaj archidyjacezii. Vykonvaŭ abaviazki vikaryja parafii Uniebaŭziaćcia Najśviaciejšaj Maryi Panny i sv. Stanisłava ŭ Mahilovie i administratara parafii Uzvyšeńnia Śviatoha Kryža ŭ Vilejcy. Z 1999 h. pa 2001 h. vučyŭsia ŭ Lublinskim katalickim univiersitecie (Polšča), dzie atrymaŭ stupień licencyjata teałohii. Z 2001 h. pa 2004 h. vykonvaŭ abaviazki prefiekta Miždyjacezijalnaj vyšejšaj duchoŭnaj sieminaryi ŭ Pinsku. U 2004 h. pryznačany dyrektaram Sakrataryjatu Kanfierencyi Katalickich Biskupaŭ Biełarusi. Z 2005 h. vykonvaje abaviazki kanclera kuryi Minska-Mahiloŭskaj archidyjacezii. Z 2006 h. źjaŭlajecca taksama administrataram parafii Najśviaciejšaj Trojcy (sv. Rocha) na Załatoj Horcy ŭ Minsku. Źjaŭlajecca vykładčykam ŭ Miždyjacezijalnaj vyšejšaj duchoŭnaj sieminaryi ŭ Pinsku i Katechietyčnym kaledžy imia sv. Jana Chryściciela ŭ Minsku.
Iosif Stanieŭski naradziŭsia 4 krasavika 1969 h. u Zanievičach na terytoryi sučasnaj Hrodzienskaj dyjacezii. Paśla vajskovaj słužby i pracoŭnaha dośviedu pastupiŭ u Vyšejšuju duchoŭnuju sieminaryju ŭ Hrodnie (1990 h.).Preźbiterskaje paśviačeńnie pryniaŭ 17 červienia 1995 h.; źjaŭlajecca preźbiteram Hrodzienskaj dyjacezii. U tym ža hodzie byŭ pryznačany vikaryjem parafii Sv. Vacłava ŭ Vaŭkavysku. Paśla krychu bolš čym hadavoj dušpastyrskaj pasłuhi byŭ skiravany ŭ Lublinski katalicki ŭniviersitet (Polšča), dzie atrymaŭ stupień licencyjata kananičnaha prava. U 1999 h. byŭ pryznačany vykładčykam i prefiektam Vyšejšaj duchoŭnaj sieminaryi ŭ Hrodnie. Z 2000 h. źjaŭlajecca sudździoj, a z 2005 h. — vice-aficyjałam Miždyjacezijalnaha kaściolnaha suda ŭ Hrodnie. Z 2004 h. vykładaje kananičnaje prava ŭ Katechietyčnym instytucie ŭ Hrodnie.
23 čiervienia 2005 h. byŭ pryznačany rektaram Vyšejšaj duchoŭnaj sieminaryi ŭ Hrodnie. Źjaŭlajecca členam Biskupskaj rady i Kalehii kansultantaŭ Hrodzienskaj dyjacezii. U 2007-2013 hh. byŭ adkaznym za dušpastyrskuju farmacyju maładych śviataroŭ u Hrodzienskaj dyjacezii. Z 2009 h. źjaŭlajecca kaardynataram dušpastyrstva paklikańniaŭ. U 2012 h. byŭ pryznačany kapiełanam Jaho Śviataści.
Surazmoŭcy «Našaj Nivy» ŭ Kaściole adznačajuć, što ŭsie troje novych biskupaŭ pachodziać z dobrych katalickich siemjaŭ, karystajucca vialikim aŭtarytetam. I majuć vydatnyja administratarskija zdolnaści.
