Siem faktaŭ pra Papu Franciška — jezuit, syn emihranta, futbolny zaŭziatar 29

Chorchie Maryjo Bierholjo z emblemaj lubimaha futbolnaha kłuba.

1. Arhiencinski italjaniec

Bukmiekiery pamylilisia. Kaho tolki ni nazyvali siarod favarytaŭ zaniać Śviaty Pasad — i italjancaŭ, i amierykancaŭ, hanca, aŭstryjca, brazilskaha niemca. Urešcie ž novym Papam upieršyniu staŭ pradstaŭnik Paŭdniovaj Amieryki. Chorchie Maryjo Bierholjo pryjšoŭ u śviet u 1936 hodzie ŭ Buenas-Ajresie ŭ italjanskaj siamji. Jaho baćka byŭ rabočym na čyhuncy. Chorchie — najmaładziejšy ź pieciarych dziaciej u siamji (hł. siamiejnaje fota). Apošnija 15 hadoŭ byŭ arcybiskupam Buenas-Ajresa i prymasam (najvyšejšaj duchoŭnaj asobaj) Arhienciny. Mienavita jon madernizavaŭ Kaścioł Arhienciny, jaki jašče zusim niadaŭna ličyŭsia najbolš kansiervatyŭnym. Vybar paŭdniovaamierykanca zusim nie nazavieš vypadkovym. Mienavita ŭ hetym rehijonie kolkaść katalikoŭ siarod usiaho nasielnictva najbolšaja.

2. Jezuit

U 1958 hodzie Bierholjo ŭstupaje ŭ manaski orden jezuitaŭ. Najčaściej hety orden asacyjujuć z kontrrefarmacyjaj. Jezuity z svaim vučeńniem jechali pa ŭsim śviecie — u Afryku, u Kitaj. Šmat ich było i ŭ Biełarusi. Dziakujučy ordenu paŭstavali navučalnyja ŭstanovy, najlepšyja dla taho času. Orden ličyŭsia adnym z najbolš intelektualna mocnych. Za 450-hadovuju historyju isnavańnia jezuity dali Kaściołu 44 śviatych i 34 kardynałaŭ. Ale papaŭ-jezuitaŭ jašče nie było nikoli. Siońnia jezuity nie nastolki mahutnyja, jak niekali. U Biełarusi jany prysutničajuć, ale nie samyja zaŭvažnyja.

3. Ścipły

Kažuć, što jon vielmi ścipły čałaviek u bycie. Žyŭ u maleńkaj kvatery, a jašče raniej — u pakoi, jaki abahravaŭsia piečkaj, sam hatavaŭ sabie ježu, jeździŭ na hramadskim transparcie. Kali lotaŭ u Rym, to tolki ŭ ekanom-kłasie. U Bierholjo tolki adno lohkaje, druhoje straciŭ jašče dziciem padčas reśpiratornaha zachvorvańnia.

4. Hiei, aborty, eŭtanazija

Bierholjo ličycca nie samym žorstkim kardynałam. Časta jaho navat zanosiać u «libieralny łahier». Libieralny, viadoma, u katalickim usprymańni. Ale najbolš pravilna jaho nazvać usio ž «umieranym». Čałaviekam, jaki moža zadavolić abodva baki. Bierholjo zaklikaŭ duchavienstva i pastvu vystupić suprać abortaŭ i eŭtanazii. Jon paćvierdziŭ carkoŭnaje vučeńnie pa asudžeńni homaseksualizmu, choć i zaklikaje nie źnievažać homaseksualistaŭ. Jon rašuča vystupaje suprać zakanadaŭstva, uviedzienaha ŭ 2010 hodzie ŭradam Arhienciny, jakoje dazvalaje adnapołyja šluby. Bierholjo byŭ siarod najbolš realnych kandydataŭ u 2005 hodzie. Pavodle niekatorych krynic, mienavita jon zaniaŭ druhoje miesca pry hałasavańni paśla Jozefa Ratcynhiera.

5. Kryminalnaja sprava

U 2005 hodzie suprać kardynała Bierholjo sprabavali zavieści kryminalnuju spravu. Jaho abvinavačvali ŭ damoŭlenaści z chuntaj u 1976 hodzie padčas «brudnaj vajny», kab skraści dvuch śviataroŭ-jezuitaŭ. Hetym śviataram Bierholjo prapanavaŭ pakinuć słužbu, kab nie niervavać ułady. U toj čas jak ksiandzy zaklikali da źviaržeńnia ŭłady. Ale nijakich dokazaŭ viny Chorchie Bierholjo nie było. Ale niezdolnaść ci niežadańnie supraćstajać vajskovaj chuncie 1976–1983, časta staviać u dakor Bierholjo.

6. Novaje imia

Heta pieršy papa-łacinaamierykaniec, pieršy — papa-jezuit, pieršy — papa ź imiem Francysk (Francišak). Takoje imia najpierš źviazvajuć z Franciškam z Asizi. Toj byŭ viadomy svaim askietyčnym ładam žyćcia. Jon byŭ zasnavalnikam ordena francyskancaŭ. Tamu mnohija miarkujuć, što Papa Francysk najpierš budzie zmahacca ź biednaściu, heta budzie hałoŭnaj jahonaj zadačaj padčas pantyfikatu. Chacia Bierholjo jakraz niaredka i paprakali tym, što jon niedastatkova šmat uvahi nadzialaje pytańniam sacyjalnaj spraviadlivaści.

7. «San-Łarenca» i Dastajeŭski

Lubimymi piśmieńnikami Bierholjo nazyvaje svaich suajčyńnikaŭ Chorchie Łuisa Borchiesa i Leapolda Marečala, a taksama kłasika rasijskaj litaratury Fiodara Dastajeŭskaha.

Novy Papa — vialiki amatar futbołu. Cikava, što zaŭzieje jon nie za zvyšpapularnyja ŭ Arhiencinie «Boka Chunijors» ci «Ryvier Płejt», a za kłub «San-Łarenca». Jon imkniecca nie prapuścić nivodnaha matča lubimaj kamandy, navat hulnia prachodzić na vyjeździe. Ciapier heta budzie zrabić ciažej.

Kamanda «San-Łarenca» nazvanaja ŭ honar śviatoha Łaŭrencija, a taksama katalickaha śviatara Łarensa Masy, jaki dapamahaŭ kłubu. «San-Łarenca» — dziesiacirazovy čempijon Arhienciny.

0

0

0

0

0

0

Źmicier Pankaviec

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH