Яўгену было 39 гадоў. Ён доўгі час працаваў у Лідскай ЦРБ, а таксама ў адным з прыватных медыцынскіх цэнтраў Ліды. Доктар першай кваліфікацыйнай катэгорыі. Стаж працы па спецыяльнасці — 11 гадоў. На сайце бальніцы яго фотаздымак ёсць на Дошцы гонару.
Мясцовыя жыхары ўспамінаюць пра яго, як пра добрага доктара, прафесіянала і пазітыўнага чалавека.
Сваякі мяркуюць, што ўчынак Яўгена можа быць звязаны з працоўнымі пытаннямі.
— На мінулым тыдні ён рабіў аперацыю кесарава сячэння, там прайшло не ўсё гладка — і быццам бы ў бальніцы разбіралі гэты выпадак. 4 сакавіка ён павінен быў пайсці ў адміністрацыю. Апошнія дні быў сам не свой. Перажываў, што, можа быць, ён сапраўды ў чымсьці памыліўся — кажуць сваякі.
У адміністрацыі Лідскай ЦРБ паведамілі, што ўчора, 4 сакавіка, Яўген да іх не прыходзіў «і наогул да яго не было якіх-небудзь пытанняў». Там вельмі перажываюць.
— Ён выдатны доктар і заўсёды прафесійна выконваў свае абавязкі. Доўгі час працаваў у нашай бальніцы. Да яго ніколі ніякіх пытанняў не было, ніводнага канфлікту. Па той аперацыі, аб якой кажуць сваякі, прэтэнзій да доктара не было. Там усё ўжо добра, жанчына ў парадку. Мы ўсе смуткуем і перажываем з-за таго, што здарылася, — кажуць у адміністрацыі Лідскай ЦРБ. У Яўгена засталіся жонка і 14-гадовая дачка.
