Латвійская федэрацыя хакея адправіла ліст ФХБ.
«Падчас падрыхтоўкі да ЧС-2021, пачынаючы са жніўня, мы сутыкнуліся з падзеямі ў Беларусі, якія перашкаджаюць паспяховай працы аргкамітэта. Гэта калі не ўлічваць цяжкасцяў, звязаных з пандэміяй каранавіруса. Нягледзячы на гэта, ФХЛ праявіла гатоўнасць да сяброўскіх і дзелавых адносін, што дазваляла працягваць падрыхтоўку да турніру.
На жаль, падзеі апошніх тыдняў ужо не ўскосна, а непасрэдна звязаны з ФХБ і яе кіраўніцтвам. Мы не можам ігнараваць інфармацыю і матэрыялы, прадастаўленыя СМІ, а таксама недастатковыя тлумачэнні ад беларускай федэрацыі аб сітуацыі, якая склалася.
Лічым, што вышэйзгаданыя падзеі кідаюць цень на рэпутацыю ФХБ і з'яўляюцца непасрэднай пагрозай для рэпутацыі ўсяго хакея, як віду спорту.
Прадстаўленая СМІ інфармацыя і матэрыялы аб магчымым удзеле старшыні ФХБ Дзмітрыя Баскава ў рэпрэсіях супраць мірных жыхароў Беларусі не адпавядаюць агульнапрынятым прынцыпам этыкі і маралі. Гэта не можа быць прымальна або апраўдана. За такое, паводле Кодэкса паводзін ІІХФ, асоба, якая ўчыніла падобную правіннасць, прыцягваецца да дысцыплінарнай адказнасці», — гаворыцца ў звароце.
Нагадаем, што Чэмпіянат свету па хакеі павінен адбыцца ў Мінску і Рызе ў перыяд з 21 мая па 6 чэрвеня. У арганізацыі ёсць каля 4 месяцаў да пачатку турніру, каб дакладна вызначыцца з краінамі-ўдзельнікамі і, у выпадку чаго, зрабіць замену.
