Дзіцячы цэнтр развіцця «ТрыЧатыры» адкрыецца ў сталічным мікрараёне Каменная Горка ў пачатку верасня. Кансультантам і адным з арганізатараў праекта з'яўляецца алімпійская чэмпіёнка Сочы-2014 па фрыстайле Ала Цупер.
У цэнтры будуць займацца дзеці ад 2 да 12 гадоў. Праграма для дзяцей ад двух да шасці гадоў накіравана на агульнае фізічнае развіццё. А ўжо ў старэйшых групах будзе акцэнт на гімнастыку.
У праграме цэнтра спартыўная гімнастыка, аздараўленчая гімнастыка, эстэтычная гімнастыка, фрыстайл, акрабатыка і паркур. Для кожнай групы сфарміравана ўласная праграма, якая ўлічвае асаблівасці і патрэбы дзяцей кожнага ўзросту. Заняткі будуць праводзіць дасведчаныя трэнеры. У падборы персаналу і падрыхтоўцы праграмы ўдзельнічала непасрэдна Ала Цупер, сцвярджаюць у цэнтры.
