Fota: braslav-star.by
Uletku 2022 hoda padčas vypasu bydła lasny hość pastajanna vandravaŭ u haspadarcy ad adnaho statka da inšaha — vidać, šukaŭ takich ža zubroŭ, kab nie žyć u samocie, piša Brasłaŭ.online.
Spačatku dzikaja žyvioła była spakojnaj, asabliva nie dakučała ludziam, choć pastuchi i dajarki aścierahalisia takoha susieda i zaŭsiody trymali dystancyju.
Sioleta vołat nabraŭ jašče bolš masy, jaho charaktar staŭ bolš ahresiŭnym. Asabliva pastucham jon uvieś čas dadavaŭ prablem.
Reč u tym, što zubr moh syści sa statka, naprykład, siarod nočy, abarvaŭšy pry hetym drot elektrapastucha i zrabiŭšy chod dla karoŭ, jakija adrazu ž pačynali razychodzicca pa akruzie. Pilnavać nieabchodna było i dniom, i nočču.
Časam u dojnym statku hość ładziŭ sapraŭdny miaciež i nie davaŭ dajarkam rabić svaju pracu: adhaniaŭ ich, bykavaŭ, adnojčy navat paciarpieła dojnaja karova.
Kab dziki źvier nie pryčyniŭ škodu zdaroŭju rabotnikaŭ sielhaspradpryjemstva i žycharam vakolnych viosak, u rajvykankamie była stvorana kamisija z 26 čałaviek, jakaja vyrašała składanuju zadaču. Staršynia rajvykankama Viačasłaŭ Hryščanka ŭziaŭ spravu pad asabisty kantrol.
U vyniku było pryniata rašeńnie ab transparciroŭcy zubra ŭ safary-park Nacyjanalnaha parku «Brasłaŭskija aziory» ŭ Miakianach. Na praviadzieńnie apieracyi ź biudžetu vydzielili 1800 rubloŭ.
Tamtejšyja śpiecyjalisty raspačali niekalki sprob transpartavać zubra na novaje miesca pražyvańnia, ale štoraz ciarpieli niaŭdaču.
U nacparku zvaryli vielizarnuju kletku, ale prosta chitraściu źmiaścić u jaje źviera nie ŭdavałasia. Pa słovach hałoŭnaj vietdoktarki Brasłaŭskaha rajona Aleny Šakiel, akazałasia, što preparat dla niejtralizacyi bujnoj rahataj žyvioły na zubra nie dziejničaje. Tady było pryniata rašeńnie prasić dapamohi ŭ inšych śpiecyjalistaŭ.
Vietstancyja adpraviła bolš za 40 listoŭ u roznyja zapaviedniki i arhanizacyi pa akazańni dapamohi žyviołam, ale adusiul atrymała admovu. U asnoŭnym pisali, što nie majuć dośviedu pracy z zubrami.
U Smalenskim nacyjanalnym parku raspaviali, što ŭ Rasii jość vieterynar, jaki zajmajecca takimi vypadkami. U brasłaŭčan udałosia źviazacca z maskoŭskim śpiecyjalistam, jaki, niahledziačy na svaju zaniataść i znachodžańnie na toj momant u Jakucii, pahadziŭsia pryjechać i dapamahčy.
Fota: braslav-star.by
Datu apieracyi pryznačyli zahadzia. Kletka dla žyvioły była padahnanaja pa jaho pamierach, sabrana nieabchodnaja technika, nabor śpiecyjalistaŭ, kožny ź jakich viedaŭ svaju zadaču.
Zubr znachodziŭsia ŭ statku. Vietdoktarka pryniała rašeńnie ŭvodzić preparat niekalkimi porcyjami, kab nie naškodzić zdaroŭju žyvioły. Pieršy streł śpiecyjalnym drocikam zachistaŭ dzikaha źviera, ale nie zvaliŭ z noh. Tady ŭ spravu pajšła druhaja porcyja — i zubr upaŭ. Žyvioła była źnieruchomlenaja, jaho vočy zakryli tkaninaj, kab nie pałochać.
Z dapamohaj labiodki, niekalkich čałaviek i śpiecyjalnych prystasavańniaŭ źviera zaciahnuli ŭ kletku, i jak tolki jaje dźviery začynili, vieterynar uvioŭ žyviole antydot i pastaviŭ kropielnicu dla padmacavańnia jaho arhanizma. Zubr na vačach staŭ padymacca.
Z dapamohaj mašyny «Amkadora» kletku pastavili na aŭtamabil dla pieravozki i, nie śpiašajučysia, pavieźli ŭ safary-park. Tut vializnaha źviera vypuścili, i jon chutka ŭciok u les.
Padčas praviadzieńnia apieracyi pa mabilizacyi i transparciroŭcy vietsłužba praviała nievialikaje abśledavańnia dzikaj žyvioły i vyśvietliła, što zubru, chutčej za ŭsio, 8 hadoŭ, a analizy pakazali, što jon zdarovy.
Čytajcie taksama:
Kala Pałaca Niezaležnaści pastavili statuju zubra
