Пасля выбараў прайшло больш за два месяцы, але сведчанні шматлікіх парушэнняў і фальсіфікацый працягваюць усплываць. У Рэдакцыю «Нашай Нівы» даслалі запіс з участка, на якім членаў камісіі ўгаворваюць падпісаць пратакол з патрэбнымі лічбамі. Але тыя адмаўляюцца, бо шакаваныя вынікамі галасавання, у якім разгромна перамагла Ціханоўская.

Лепш за ўсё чуваць словы Віктараўны.

«Вы як хочаце, хай мяне выганяюць з працы, але мне сумленне не дазволіць, я не магу, не падпішу такія лічбы. Астатнія як хочуць, а я не падпішу. Падтасаваць можна трохі, я лічу, гэта можна.

А тут Дзмітрыеў — нуль, Канапацкая — нуль, за Чэрачня два чалавекі ўсяго толькі, за Лукашэнку ў мяне тры чалавекі ўсяго толькі. Усё. Астатнія ўсе за Ціханоўскую.

Я не магу падпісаць. Я праўда не магу, хоць павесьце мяне. […] Як мы будзем людзям у вочы глядзець? Мы выйдзем і людзі нас будуць сустракаць», — кажа жанчына.

Пасля Віктараўна прапануе давесці людзям рэальныя лічбы. На што маладзейшыя суразмоўцы ёй раяць: дык едзьце ў выканкам і даводзьце!

Жанчына ўпіраецца — падпісаць не магу ніяк. Яе падтрымлівае камісія.

«Зрабіце 5% розніцу хаця б, а не такую пякельную», — раіць хтосьці, меркавана, член камісіі.

«Лічбы будуць у любым выпадку. Не мы, дык раённая камісія», — тлумачаць нязгодным.

«І з ёй будучыні не відаць, і з ім незразумела што. Што выбіраць? — задаецца пытаннем жанчына, меркавана, выказваючыся пра Ціханоўскую і Лукашэнку. — Усё роўна вышэй зробяць так, як ім трэба. Дык хай сваімі рукамі заграбаюць, навошта нашымі?»

«Марына, цябе звольняць і нідзе не возьмуць, ні на якую працу», — абяцаюць ёй.

«Я не чакала такіх вынікаў. Я ў шоку! Я думала, будзе ісці роўненька так…» — кажа разгубленая жанчына пра свае чаканні ад вынікаў Лукашэнкі і Ціханоўскай.

«Рабяты, падумайце. Усё роўна гэта будзе, але наступствы будуць кепскія для нас, — яшчэ раз палохае камісію нехта Мікалаевіч. — Я лічу, што трэба падпісаць. Так, кепска. Лепш ад гэтага будзе ці горш — не ведаю. Але ўсё ж неяк будзе спакойна ў рэспубліцы. Можа, недзе сябе перасіліць, але падпісаць».

Пасля Мікалаевіч палохае вайной («Стаяць калоны з тэхнікай, там незразумелыя рабяты з бародамі»), і нават цісне на сумленне («Так, сорамна. Я ў шаленстве сёння быў»).

Мікалаевіча просяць змяніць лічбы на сапраўдныя, ён упарта адмаўляе — немагчыма.

«Гэта ж вар'яцкая хлусня», — кажа Віктараўна.

«Ды што вы кажаце? Нібыта я гэтага не разумею? Што я, тупы зусім?» — адказвае Мікалаевіч.

«Ты ўяві, як спаць чалавеку [пасля такога]? Мне дрэнна», — працягвае Віктараўна.

Чым скончылася абмеркаванне, невядома. Камісія не паказала пратакол выбарцам і назіральнікам.

Найхутчэй, падзеі адбываюцца ў Палацы культуры МАЗ, дзе знаходзіўся участак №70 Заводскага раёна.

Меркавана, той самы «Мікалаевіч» — гэта старшыня камісіі Уладзімір Мікалаевіч Усачоў. «Віктараўна» — член камісіі Галіна Віктараўна Канаплянік.

Усе яны працуюць на МАЗе, нездарма Мікалаевіч палохае людзей звальненнямі і «генеральным» — то-бок, гендырэктарам. Пра нейкую незалежнасць камісіі размова не ідзе — усім зразумела, што за не той вынік будуць пакаранні. Уладзімір Мікалаевіч Усачоў працуе намеснікам галоўнага інжынера, Галіна Канаплянік — работнік прафкама завода.

«Наша Ніва» звязалася з некаторымі меркаванымі фігурантамі гэтай гісторыі. Яны ж працавалі ў камісіі і на парламенцкіх выбарах — 2019, і падчас папярэдніх кампаній.

Уладзімір Усачоў («Мікалаевіч») коратка пракаментаваў з’яўленне аўдыязапісу: «Хлусяць як сівыя мерыны».

Пасля чаго кінуў слухаўку.

Сакратарка камісіі Таццяна Маліноўская (яна таксама працуе на МАЗе) прачытала паведамленне ад журналіста, але вырашыла не адказваць.

Галіна Канаплянік («Віктараўна») не захацела выйсці на сувязь, перадаўшы праз сваякоў, што «каму трэба, той яе знойдзе».

Уладзімір Усачоў і Таццяна Маліноўская на выбарах у 2019 годзе. Тады агенцтва «Спутнік» рабіла лубочны рэпартаж з іх МАЗаўскага ўчастка: маўляў, прыгажосць, і беляшы, і падарункі выбарцам, і хор ветэранаў… Фота Тамары Зенінай, «Спутнік»

Хочаш падзяліцца важнай інфармацыяй ананімна і канфідэнцыйна?

3
Nokia / Адказаць
14.10.2020 / 17:25
Фальсіфікатараў пад суд !
3
Жвір / Адказаць
14.10.2020 / 17:29
Гадзюшнік ! Выканкам... Гэта ж вынікае, што ўся лукашэнкаўская вертыкаль настрапалёная на фальсіфікацыі і адказвае(!) за патрэбны дыктатару вынік ! Усе яны на бюджэце, усіх іх корміць народ, ня які ім начхаць, зусім ! Гэта ж які гадзюшнік ! Што ж гэта за дзяржаву пабудаваў самазванец ??? Няма словаў... Мафія і рабы. Бароны сядзяць сваімі тоўстымі азадкамі на шыях у рабоў, якім нават варушыцца забаронена ў свой бок, якія там нафік правы... Гэта не павінна існаваць. У людзей проста няма іншай дарогі, адно толькі скідаць гэтых гадаў, бандзітаў, паразітаў, самых сапраўдных, з каркаў...
4
даведка / Адказаць
14.10.2020 / 17:44
После такого весь МАЗ просто обязан встать на дыбы!
Паказаць усе каментары/ 23 /
Каб пакінуць каментар, калі ласка, актывуйце JavaScript у наладах свайго браўзеру