Святлана Ціханоўская асудзіла рэпрэсіі супраць журналістаў.
Фота Надзеі Бужан
«Я не перастаю захапляцца беларускімі журналістамі. Бясстрашныя, яны працягваюць выконваць сваю працу, нягледзячы на ціск, пагрозы і арышты. Рэжым баіцца праўды. Менавіта дзякуючы журналістам свет даведаўся пра тое, што адбывалася ў Мінску ў жніўні і працягвае адбывацца кожны дзень.
Журналістаў пераследуюць. У карэспандэнтаў «Радыё Свабода» забралі акрэдытацыі. Дэпартавалі замежных рэпарцёраў. Шантажавалі «Белсат» і пагражалі яму. У першыя дні пасля выбараў паранілі журналістку «Нашай нівы» Наталлю Лубнеўскую. Пасадзілі фатографаў Уладзя Грыдзіна і Аляксандра Васюковіча. Два дні таму арыштавалі рэдактара «Нашай Нівы» Ягора Марціновіча. Сёння рэжым заявіў, што хоча пазбавіць статусу СМІ TUT.by.
Падчас сустрэч з замежнымі лідарамі я кажу пра падтрымку беларускіх СМІ. Неабходная самая розная дапамога: абсталяванне, офісы, бяспека. Пару дзён таму я гаварыла пра гэта з міністрам замежных спраў Канады, і ён абяцаў аказаць падтрымку.
У новай Беларусі няма месца пераследу журналістаў. У новай Беларусі няма месца цэнзуры. У новай Беларусі журналісты будуць кантраляваць уладу, і ніхто не будзе мець права ім у гэтым перашкаджаць», — заявіла Ціханоўская.
