Начальніца аддзела дзяржаўнага пратакола прэзідэнта Беларусі Дар’я Шманай таксама набыла сабе апартаменты ў «Алімпік Парку» — элітным жылым комплексе на вуліцы Ратамскай з відам на заказнік «Лебядзіны».
Дар'я Шманай, фота «УКантакце»
У суседнім доме, нагадаем, пасялілася прэс-сакратарка кіраўніка краіны Наталля Эйсмант.
Чытайце. Наталля Эйсмант купіла апартаменты ў «Алімпік Парку» за $167 тысяч
Шманай і Эйсмант — сяброўкі, яны часта выстаўляюць у інстаграм сумесныя здымкі. Жыллё куплялі таксама прыкладна ў адзін час — у сакавіку 2019 года, з розніцай у тыдзень.
Дар'я Шманай і Наталля Эйсмант, фота з «УКантакце» Дар'і Шманай
Плошча трохпакаёвай кватэры Шманай — 99,4 метра. Кватэры ў гэтым і суседнім дамах «Тапас» прадаваў па $1500-1700 за квадратны метр. Яшчэ каля $15 тысяч каштавала машынамесца.
«Алімпік Парк», фота Надзеі Бужан
Дар’я Шманай нарадзілася ў 1993 годзе. Яна скончыла БДЭУ па спецыяльнасці «бухгалтарскі ўлік, аналіз і аўдыт у гандлі і грамадскім харчаванні». У 2013 Шманай перамагла ў конкурсе прыгажосці «Каралева Вясна» і неўзабаве пачала суправаджаць Аляксандра Лукашэнку на мерапрыемствах. Стала афіцыйнай работніцай службы пратакола прэзідэнта.
«Што тычыцца Дашкі, пра якую вось гаворка ішла, так я яе ўжо 2 гады ведаю, — расказваў Лукашэнка ў інтэрв’ю Ксеніі Сабчак у 2014 годзе. — Яна працуе, вельмі прыстойная дзяўчына! Калі б у мяне такая была дзяўчына, ну слухай, гэта… гэта вышэй за дах».
Якія вядомыя беларусы сталі суседзямі Шманай?
«Наша Ніва» ўжо пісала пра экс-кіраўніка Міншчыны і Гродзеншчыны Сямёна Шапіру.
Чытайце. Сямён Шапіра расказаў, як стаў гаспадаром дзвюх кватэр у элітным «Алімпік Парку» агульным коштам каля $250 тысяч
Таксама кватэру набыла 68-гадовая Галіна Жураўкова — легендарная экс-кіраўніца спраў прэзідэнта.
У пачатку 2000-х узначальвала бізнэс-імперыю, якая падпарадкавала сабе цукровы, тытунёвы і нафтавы рынкі краіны. У 2004 годзе Жураўковай прысудзілі 4 гады зняволення за крадзеж $3,6 мільёна — але праз пару месяцаў Лукашэнка амніставаў яе, і яна назаўжды знікла з беларускага палітычнага гарызонта.
Галіна Жураўкова
Цяпер Жураўкова набыла кватэру ў элітным доме на Ратамскай. Прычым сваіх грошай амаль не было, «Тапас» аформіў растэрміноўку на $95 тысяч.
