Спадкаемцы Джэрама Дэвіда Сэлінджэра далі дазвол на публікацыю працягу яго знакамітага рамана «Над прорвай у жыце» ва ўсіх краінах свету, акрамя ЗША і Канады, піша The Guardian.
У ЗША і Канадзе раман забаранілі да публікацыі да заканчэння тэрміну аховы аўтарскіх правоў.
Працяг пад назвай «Праз 60 гадоў: ідучы скрозь жыта» (60 Years Later: Coming Through the Rye) быў напісаны шведскім аўтарам Фрэдрыкам Колцінгам (пад псеўданімам Джон Дэвід Каліфорнія). Па сюжэце пастарэлы Холдэн Колфілд збягае з прытулку для састарэлых і адпраўляецца ў Нью-Ёрк. Адным з персанажаў рамана выступае сам Сэлінджэр.
Аб існаванні гэтай кнігі стала вядома ў маі 2009 года. Неўзабаве яна была апублікаваная ў Вялікабрытаніі і ў Швецыі, аднак ужо ў чэрвені Сэлінджэр падаў у суд з намерам забараніць публікацыю сіквела, які ён назваў «банальным і павярхоўным плагіятам». Суд прыпыніў публікацыю кнігі, але пасля смерці пісьменніка ў студзені 2010 года шведы працягнулі перамовы з яго нашчадкамі.
У выніку ім удалося дасягнуць пагаднення, падрабязнасці якога не раскрываюцца. Вядома толькі, што шведскаму выдаўцу забаранілі згадваць у кнізе Холдэна Колфілда, раман «Над прорвай у жыце», а таксама прысвячаць кнігу Сэлінджэру. Па словах Колцінга, публікацыяй яго рамана ўжо зацікавіліся выдаўцы ў шасці краінах.
Брытанскія крытыкі ў сваіх рэцэнзіях на раман сышліся ў меркаванні, што гэтая кніга ўяўляе сабой «фан-фікшн» і «бяскрыўднае глупства».
