Ілюстрацыйнае фота: AP
ЗША плануюць упершыню ў гісторыі ўвесці санкцыі супраць падраздзялення арміі абароны Ізраіля. Гаворка ідзе пра батальён «Нецах Іегуда», паведамляе Axios.
Падраздзяленне падазраюць у парушэнні правоў чалавека на Заходнім беразе ракі Іардан. Паводле амерыканскіх чыноўнікаў, ізраільскія салдаты ўжывалі гвалт да мірных палестынцаў у гэтым раёне яшчэ да пачатку поўнамаштабнай вайны супраць ХАМАС.
Чакаецца, што дзяржсакратар ЗША Энтані Блінкен абвесціць пра санкцыі найбліжэйшым часам. Абмежаванні будуць азначаць, што батальён і яго вайскоўцы не змогуць атрымліваць дапамогу ад ЗША.
Ізраільскі прэм'ер Біньямін Нетаньяху назваў увядзенне санкцый супраць ізраільскіх салдат падчас вайны з ХАМАС «верхам абсурду і амаральнай нізасцю». Ён заявіў, што ўрад будзе ўсімі сіламі змагацца супраць абмежаванняў.