Джо Байдэн Фота: Susan Walsh / AP
Прэзідэнт ЗША Джо Байдэн назваў бязмозглай і ганебнай заяву яго патэнцыйнага суперніка на прэзідэнцкіх выбарах Дональда Трампа аб нежаданні абараняць саюзнікаў па NATO, піша Бі-бі-сі.
Джо Байдэн прысвяціў выказванням Трампа частку сваёй заявы для прэсы, галоўнай тэмай якой быў закон аб шматмільярднай вайсковай дапамозе Украіне і іншым саюзнікам і яго праходжанне праз Кангрэс.
Заклікаўшы спікера Палаты прадстаўнікоў, аднадумца Трампа Майка Джонсана паставіць законапраект на галасаванне і выказаўшы ўпэўненасць, што ён гэта галасаванне пройдзе, Байдэн дадаў, што апошнія выказванні Трампа дадаюць тэрміновасці і важнасці справе падтрымкі Злучанымі Штатамі саюзнікаў.
«Ніводзін іншы прэзідэнт у нашай гісторыі ніколі не схіляўся перад рускімі дыктатарамі. Дазвольце мне цалкам выразна заявіць: я ніколі не схілюся. Ды Божа мой, гэта ж бязмозгла, гэта ганебна, гэта небяспечна. Гэта не па-амерыканску», — так прэзідэнт ацаніў выказванні экс-прэзідэнта.
Дональд Трамп на мінулым тыдні на мітынгу ў Паўднёвай Караліне распавёў пра размову, якая быццам бы была ў яго з лідарам адной з краін NATO на саміце альянсу.
Як распавёў Трамп, гэты лідар пацікавіўся, ці прыйдуць ЗША на дапамогу ягонай краіне ў выпадку нападу Расеі, нават прытым, што ягоная краіна не выконвае прыняты ў NATO нарматыў вайсковых выдаткаў 2% ад ВУП.
«Я сказаў: вы не заплацілі, вы пратэрмінавалі? — нібыта адказаў Трамп кіраўніку неназванай краіны. — Не, у такім выпадку я не буду вас абараняць, больш за тое, я буду заахвочваць іх рабіць усё, што ім захочацца. Вы павінны плаціць па сваіх рахунках»»
Байдэн у аўторак заявіў, што Трамп ставіцца да NATO як да інструмента вымагальніцтва.
«Пакуль я — прэзідэнт, калі Пуцін нападзе на саюзніка па NATO, Злучаныя Штаты будуць абараняць кожную цалю тэрыторыі NATO», — запэўніў Байдэн.
Перад гэтымі фразамі, кажучы пра законапраект аб дапамозе Украіне і іншым саюзнікам, Байдэн звярнуўся да чальцоў Палаты прадстаўнікоў ад Рэспубліканскай партыі: «Вы збіраецеся падтрымліваць Украіну ці вы збіраецеся падтрымаць Пуціна? Вы за Амерыку ці за Трампа?»
Джо Байдэн — прадстаўнік Дэмакратычнай партыі, які да таго ж усё жыццё займаўся знешняй палітыкай, і ён лічыць, што ЗША, як вядучая дэмакратычная дзяржава, абавязаны актыўна ўдзельнічаць у сусветных справах і ў тым ліку ў барацьбе з аўтарытарнымі рэжымамі.
Трамп жа з яго лозунгам »Амерыка перш за ўсё« на словах заўсёды быў схільны да ізаляцыянізму і, у прыватнасці, неаднаразова заяўляў, што ЗША не павінны дапамагаць тым саюзнікам па NATO, што не хочуць выконваць нарматыў ваенных выдаткаў у 2% ВУП.
Абавязанне давесці вайсковыя выдаткі да гэтых двух адсоткаў ВУП краіны NATO ўзялі на сябе яшчэ ў 2014 годзе, пасля захопу Расеяй Крыма і развязвання вайны ў Данбасе. Пры гэтым дасягнуць гэтага арыентыру саюзнікі паабяцалі адзін аднаму вельмі няхутка — да 2030 года.
Поўнамаштабнае ўварванне Расіі ва Украіну падштурхнула краіны NATO, і цяпер, паводле папярэдніх падлікаў альянсу, гэтую норму выконваюць 18 з 31 краіны блока. ЗША выдаткоўваюць на ўзброеныя сілы 3,5% свайго ВУП, і ў абсалютных лічбах іх вайсковыя выдаткі нашмат большыя, чым выдаткі ўсіх астатніх чальцоў NATO разам узятых.
Чытайце таксама:
Заходнія палітыкі адрэагавалі на словы Трампа пра адмову абараняць ад Расіі
Еўропе трэба дзесяць гадоў, каб цалкам падрыхтавацца да абароны — кіраўнік Rheinmetal
Якія краіны рызыкуюць застацца без абароны, калі прэзідэнтам ЗША стане Дональд Трамп
