Расійскі праўладны спявак Шаман. Фота: Contributor Getty Images
Расійскі тэлеграм-канал BAZA атрымаў ад сваіх крыніц бытавы райдар (спіс умоў і патрабаванняў) праўладнага спевака Шамана, які высылаецца кожнаму арганізатару ягоных канцэртаў.
«Усе пункты гэтага райдара з'яўляюцца абавязковымі», — напісана ў дакуменце.
Так, паводле спісу ўмоў, для раз'ездаў па канцэртах (а таксама ў аэрапорты і вакзалы) у межах Масквы і Маскоўскай вобласці арганізатары павінны падаць Шаману «Мэрсэдэс Майбах» з таніраваным шклом.
Што да паездак па іншых гарадах ці тых паездак, час шляху да месца правядзення канцэртаў у якіх складае больш за паўтары гадзіны, можна абмежавацца таніраваным «Мэрсэдэсам V-класа» з класічным салонам і матрацам па памеры задняй канапы з коўдрай і падушкамі, напісана ў дакуменце.
Для перамяшчэнняў каманды спевака ў райдары пазначана неабходнасць браніравання «мікрааўтобуса на 12 чалавек з фіранкамі на вокнах».
Самога Шамана павінны суправаджаць два ахоўнікі на машынах не ніжэйшых за бізнэс-клас. На канцэртах павінны прысутнічаць «па 8 ахоўнікаў на кожныя 1000 гледачоў».
«Для пражывання неабходны самы лепшы 5-зоркавы гатэль у горадзе, размешчаны максімальна блізка да месца правядзення мерапрыемства. Артыст павінен жыць у нумары «люкс» з ложкам памеру King Size, дзвюма падушкамі з гусінага пуху і цвёрдым матрацам. Абавязковая наяўнасць святлонепранікальных штораў ці харчовай фольгі на вокнах.
Для астатняй каманды — стандартныя аднамесныя нумары», — падкрэсліваецца ў райдары Шамана.
Акрамя гэтага, крыніцы тэлеграм-канала Baza адзначылі, што паўтары гадзіны кожнага выступлення Шамана ў сярэднім каштуюць 12 мільёнаў расійскіх рублёў.
Нагадаем, што сапраўднае імя Шамана — Яраслаў Дронаў. Яму 30 гадоў, нарадзіўся ў Навамаскоўску, раней выступаў у стылі фолк. Папулярнасць у Расіі прыйшла да спевака дзякуючы яго праўладным трэкам «Устанем» і «Я рускі».
Чытайце таксама:
«Ёсць Shaman і ёсць усе астатнія». Музычны крытык — пра музыку расійскай прапаганды
Былы блогер з каманды А4 пра гастролі па Крыме: А ў чым праблема?
