Гіём Мёрыс. Фота: афіцыйны сайт гумарыста і журналіста guillaumemeurice.fr
Як паведамляе Le Monde, Радыё Францыя (Radio France) трапіла пад агонь крытыкі з-за жарта папулярнага гумарыста. Запрошаны для ўдзелу ў гумарыстычнай праграме Le grand dimanche soir («Вялікі нядзельны вечар») на канале France Inter гумарыст Гіём Мёрыс (Guillaume Meurice), пачаў пералічваць «касцюмы для таго, каб настрашыць» у надыходзячы Хэлоўін.
«Цяпер ёсць касцюм Нетаньяху, які нядрэнна cпрацуе, — сказаў Мэрыс. — Вы ведаеце, хто гэта? Нібы нацыст, але абрэзаны».
Яго словы былі асуджаныя як антысеміцкія і абразлівыя многімі слухачамі, палітыкамі, журналістамі і грамадскімі дзеячамі. Акрамя гэтага, жартаўніку сталі пагражаць смерцю.
Вядомы адвакат канала CNews Жыль-Вільям Гольднадэль (Gilles-William Goldnadel), заявіў, што падасць пазоў супраць таго, каго ён ахрысціў «MeuriSS» (падваенне зычных нагадвае аб атрадах СС).
«З абразаннем ці без: я хутчэй за тое, каб абрэзаць час эфіру Гіёма Мёрыса (і мандат Нетаньяху таксама, але гэта іншая гісторыя)», — выказалася ў сваю чаргу рабін Дэльфін Арвілёр (Delphine Horvilleur).
Дырэктар Radio France Адэля Ван Рыт (Adèle Van Reeth) вымушаная была прасіць прабачэння за жарт і абараняць свабоду выказвання гумарыстаў:
«Існаванне прасторы для палітычнай сатыры, у якой можна высмейваць уладу і яе прадстаўнікоў, зʼяўляецца прыкметай дзейнай дэмакратыі», — настойвае яна і дадае: «Шмат у чым была пяройдзена мяжа: не мяжа закона, а павагі і годнасці».
Адзін з кіраўнікоў Radio France на ўмовах ананімнасці адзначыў: «Мы не можам падазраваць Гіёма ў антысемітызме. Але жартаваць на гэтую тэму ў такі трагічны момант, як той, які мы перажываем, вельмі рызыкоўна». Па яго словах, гэты выпадак можа ўдарыць па папулярнасці радыёстанцыі.
Сам Мёрыс адказаў на крытыку ў X (былы Twitter), спасылкамі на сваіх куміраў — спевака Жоржа Брасанса (Georges Brassens) і часопіс Charlie Hebdo, якія таксама выкарыстоўвалі сатыру і правакацыю ў сваёй творчасці.
Пад хэштэгам #jesuischarlie ён апублікаваў малюнак пад назвай «Вынаходніцтва гумару», на якім дагістарычны чалавек рыхтуецца паднесці кубак з алеем бліжэй да палаючай паходні.
Мёрыса падтрымала яго калега на перадачы Шарліна Ваненакер (Charline Vanhoenacker). Яна адзначыла, што Гіём не антысеміт, ён толькі крытыкаваў палітыку Нетаньяху. Ваненакер таксама прызнала, што ў цяперашняй атмасферы нянавісці гумар стаў вельмі складаным і рызыкоўным жанрам.
Як паведамляецца, жарт Мёрыса з адсылкай да абразання і нацызму будзе правераны Упраўленнем па рэгуляванні аўдыявізуальных і лічбавых камунікацый (Arcom).
Le Monde адзначае, што гэта не першы выпадак, калі гумарысты канала France Inter сутыкаюцца з крытыкай за сваю сатыру на палітыку, якая зʼяўляецца часткай духу станцыі. Раней іншы гумарыст Фрэдэрык Фрамэ (Frédéric Fromet) прыносіў прабачэнні за свае песні аб аднаполым каханні і карыдзе, якія былі няправільна зразуметыя або асуджаныя некаторымі слухачамі.
Чытайце яшчэ:
