Выява: Tinder
Tinder запускае новую функцыю пад назвай Tinder Matchmaker, якая дазволіць сям'і і сябрам карыстальнікаў атрымліваць доступ да праграмы для знаёмстваў і даваць рэкамендацыі для патэнцыйных супадзенняў (нагадаем, што ў праграме магчымасць прамой перапіскі з чалавекам, які вам спадабаўся, разблакуецца толькі тады, калі гэты чалавек таксама паставіць вам падабайку — то-бок адбудзецца супадзенне).
Што цікава: сватам не трэба быць зарэгістраванымі і мець профіль у Tinder, каб праглядаць або прапаноўваць вам патэнцыйную другую палавінку. Гэта азначае, што хто заўгодна — ад вашай бабулі да вашага былога хлопца — можа дапамагчы вам выбраць новы профіль для супадзення.
Карыстальніку Tinder трэба будзе запусціць «сеанс Tinder Matchmaker» непасрэдна са сваёй карткі профілю або ў наладах праграмы. Калі вы бачыце патэнцыйнага кандыдата ці кандыдатку, вы можаце падзяліцца ўнікальнай спасылкай з максімум 15 асобамі на працягу 24 гадзін. Пасля таго як сват атрымае спасылку, ён можа ўвайсці ў Tinder або працягнуць у якасці госця.
Але не хвалюйцеся: сваты не могуць адпраўляць паведамленні або ставіць падабайку тым ці іншым профілям, каб гэта ўплывала на ваш профіль. Калі сват «лайкне» нейкі профіль, то гэта з'явіцца ў якасці рэкамендацыі для вас як для першапачатковага карыстальніка Tinder. Гэта значыць, у выніку галоўны карыстальнік сам вырашае, падабаецца яму прапанаваны чалавек ці не.
«Адзінокія людзі даўно прасілі сваіх сяброў дапамагчы знайсці для іх пару ў Tinder, а цяпер мы спрашчаем гэты працэс з дапамогай Tinder Matchmaker», — кажа пра новую функцыю Меліса Хоблі, галоўны дырэктар па маркетынгу Tinder.
Дарэчы, у праграме для пошуку пары Bumble ўжо ёсць падобная прапанова, дзе карыстальнік можа рэкамендаваць профіль сябру праз прыватную спасылку, распавядае Engaget. Аднак гэтая функцыя больш прыстасаваная для абмену сам-насам у параўнанні з Tinder Matchmaker.
Hinge, іншая мабільная праграма для знаёмстваў, яшчэ ў 2017 годзе спрабавала запусціць асобную праграму Hinge Matchmaker, у якой сваты павінны былі прапаноўваць патэнцыйных партнёраў на аснове асабістых сяброў з Facebook. Гэтая другасная праграма не пратрымалася ў Hinge, цяпер гэтая апка больш недаступная.
Функцыя «сватоў Tinder» — гэта толькі апошняя прапанова ад кампаніі, створаная для таго, каб заахвоціць больш карыстальнікаў да ўзаемадзеяння з праграмай па-новаму. Да гэтага Tinder зрабіў верыфікацыю з дапамогай з сэлфі-відэа (каб патэнцыйныя партнёры маглі даказаць, што яны сапраўдныя людзі); а таксама рэжым інкогніта нарэшце быў уведзены ў пачатку гэтага года (у ім толькі людзі, якія вам падабаюцца, пабачаць вас у сваіх рэкамендацыях).
Да таго ж кампанія нядаўна пачала дазваляць карыстальнікам вызначаць гендарныя займеннікі і тыпы адносін, арыентуючыся відавочна на пакаленне Z з яго інакшымі поглядамі на спатканні і пол. Так, зараз вы можаце пазначыць, шукаеце вы манагамныя або неманагамныя адносіны (ці ўсё яшчэ высвятляеце гэта), і пералічыць родавыя займеннікі, якімі вам хочацца, каб вас называлі. Абедзве новыя функцыі запазычаныя ў Hinge.
Чытайце таксама:
«Не лайкаю мужчын з голым торсам». Беларускі расказалі, па якіх крытэрыях выбіраюць хлопцаў у Tinder
