Фота: vdobrushe.by
Для атрымання хабару за своечасовую адгрузку прадукцыі і вырашэнне іншых пытанняў кіраўнік прадпрыемства выкарыстаў свайго брата. Затрыманне адбылося ў момант, калі атрыманыя братам грошы былі перададзеныя непасрэдна дырэктару прадпрыемства.
Па словах аператыўнікаў, прадстаўнік камерцыйнай структуры перадаў братам 155 тыс. расійскіх рублёў і 33,5 тыс. беларускіх, што адпавядае хабару ў буйным памеры.
З аператыўнай здымкі вынікае, што на момант затрымання сумы хабару ўжо былі размеркаваныя паміж змоўцамі.
Кадр з аператыўнай здымкі затрымання службовай асобы Добрушскага фарфоравага завода
Атрыманне хабару ў расійскіх рублях можа сведчыць аб тым, што сродкі за спрыяльнае развязанне пытанняў перадаваліся расійскай камерцыйнай структурай.
«Флагшток» звярнуўся ў прыёмную ЗАТ «Добрушскі фарфоравы завод» з просьбай звязацца з дырэктарам Вінакуравым. «Паглядзіце зводку МУС!», — адказаў усхваляваны сакратар дзяржпрадпрыемства.
Акрамя кіраўніцтва Добрушскім фарфоравым заводам Аляксандр Вінакураў з'яўляецца дэпутатам Добрушскага раённага савета дэпутатаў. У 2021 годзе ён быў дэлегатам шостага УНС ад Гомельскай вобласці.
Публікацыя на сайце газеты «Добрушскі край», прысвечаная вылучэнню Аляксандра Вінакурава дэлегатам УНС
З дэкларацыі аб маёмасці Аляксандра Вінакурава, апублікаванай падчас выбарчай кампаніі 2018 года, вынікае што гадавы даход кіраўніка складаў тады каля 13,5 тыс. даляраў.
Чытайце таксама:
Кіраўнік Добрушскага раёна выратаваў хлопчыка, які тануў у віры на Іпуці, добрай парадай
Да шасці з паловай гадоў калоніі прысудзілі былога старшыню Хоцімскага райвыканкама
