Ілюстрацыйнае фота
У сям'і Мядзведзенкаў — шасцёра дзяцей. Двое ўжо дарослыя, самай малодшай, Міраславе, праз два тыдні павінна было споўніцца тры гады. Але ўчора дзяўчынка патанула ў Дняпры.
Як аказалася, днём Міраслава з двума братамі — 5-гадовым Макарам і 7-гадовым Арсеніем — гулялі ў двары. Мама Алеся завіхалася па гаспадарцы. Жанчына цяжарная, ёй ужо вось-вось нараджаць.
Каля шасці вечара хлопчыкі прыбеглі дадому: «Мама, кудысьці знікла Міраслава», — успамінае жанчына.
— Я на вуліцу — няма нідзе! Бегала, клікала. Рака ў нас проста за агародам, туды выбягала некалькі разоў, глядзела.
Алеся распавядае, што пра небяспеку ракі дзецям у сям'і казалі пастаянна — і тыя без дарослых туды ніколі не хадзілі.
— Дзеці, суседзі, муж з працы прыбег — усё шукаем, не можам знайсці. А потым гляджу — старэйшы сын нясе на руках маю дачушку, — плача Алеся.
Міраславу знайшлі пад абрывістым берагам Дняпра. Дзяўчынка патанула.
