Ад імя палітзняволенай каардынатаркі валанцёрскай службы пазбаўленага рэгістрацыі праваабарончага цэнтра «Вясна» Марфы Рабковай прыйшоў фэйкавы ліст з СІЗА №1.
Днямі маці аднаго з вязняў атрымала «адказ» ад Марфы, дзе тая ў фарбах піша пра кепскіх людзей з КДБ і ГУБАЗіК і «абвінавачванні ў адміністраванні чатаў».
Аднак почырк у лісце не супадае з почыркам Марфы Рабковай, што пацвердзілі сваякі. Больш за тое, Марфа перадала з ізалятара, што не пісала ніякіх лістоў гэтай жанчыне. Акрамя таго, ёй самой карэспандэнцыя ад маці і бацькі не даходзіць.
«Разлік быў на тое, каб справакаваць суразмоўцу на «радыкальныя размовы», якія ў далейшым можна выкарыстоўваць у матэрыялах справы», — гавораць калегі Марфы Рабковай.
Як стала вядома, Марфа знаходзіцца ў маленькай камеры, пры гэтым у яе даўно адсутнічаюць прагулкі, а ў апошні час у яе пачала балець спіна з-за тонкага матраца і металічных нараў.
