«Учора ўвечары, калі БТ спрабавала павучыць нас гісторыі (а ў сапраўднасці — дыскрэдытаваць у вачах недасведчаных гледачоў нацыянальны беларускі сцяг), экспертам у іх выступіў В. Даніловіч, цяперашні дырэктар акадэмічнага Інстытута гісторыі, — напісаў у сваім фэйсбуку доктар гістарычных навук Генадзь Сагановіч.
Можа і не звярнуў бы ўвагі, калі б не гэтая акалічнасць. Чыноўнік ад гісторыі ўзняў заезджаную тэму калабарацыі і дагаварыўся вось да якога абсурду: маўляў, паколькі ў гады ІІ Сусветнай вайны бел-чырвона-белы сцяг выкарыстоўвалі калабарацыяністы, то «получается» (так у Даніловіча), што гэты сцяг і цяпер «говорит о том, что надо двигаться к какому-то протекторату с какой-то внешней стороны» (?!).
Не ўваходзячы ў глыбейшую гісторыю сцяга і не кранаючы праблемы калабарацыі ды характару той вайны (выйшла ўжо нямала глыбокіх даследаванняў, у якіх развянчаны савецкі міф Вялікай Айчыннай), хацеў бы супакоіць Даніловіча.
У тыя гады не толькі ў іншых савецкіх рэспубліках, а пэўна ў кожнай акупаванай нацыстамі краіне таксама выкарыстоўвалася нацыянальная сімволіка, і ніводзін народ не адракаўся ад яе, не адмаўляўся ад сваёй гісторыі на гэтай падставе!
У беларусаў няма больш гістарычнага і больш нацыянальнага сцяга за бел-чырвона-белы! Здаецца, не толькі гісторыку, а любому чалавеку з гістарычнай свядомасцю трэба было б радавацца, што ў дні самых масавых пратэстаў супраць фальшу і гвалту ён так натуральна вярнуўся да народа.
Таму адчуваеш агіду, калі дырэктар акадэмічнай установы, якая павінна падаваць прыклады асцярожнага і аб’ектыўнага падыходу да мінулага, апускаецца да падобных прыёмаў палітычнай маніпуляцыі. А сумленным калегам, сапраўдным прафесіяналам сваёй справы, якім даводзіцца там працаваць, яшчэ больш павагі!