Пра гэта паведаміў сёння журналістам міністр замежных спраў Беларусі, паведамляе БелТА.
«Яшчэ ідзе працэс распрацоўкі прапаноў па далейшым паглыбленні інтэграцыі. Ніякіх паправак (у саюзную дамову) не прадугледжана», — сказаў Уладзімір Макей.
Ён адзначыў, што цяпер вядзецца размова аб поўнамаштабным выкананні мерапрыемстваў, якія прадугледжаны існуючым дагаворам аб стварэнні Саюзнай дзяржавы. «На нейкім этапе ў выніку розных прычын тыя ці іншыя палажэнні не былі рэалізаваны, таму цяпер якраз ідзе работа над іх аналізам і распрацоўка прапаноў па поўнамаштабнай імплементацыі тых палажэнняў. Плюс ідзе дыскусія, як вырашаць праблемы, што сёння знаходзяцца на паверхні, па якіх ёсць нейкія разыходжанні або спрэчкі», - дадаў міністр.
Чакаецца, што ў бліжэйшыя дні ў Мінску адбудзецца сустрэча Аляксандра Лукашэнкі з яго расійскім калегам Уладзімірам Пуціным, які запрошаны на цырымонію закрыцця II Еўрапейскіх гульняў. Кіраўнікі дзяржаў плануюць абмеркаваць развіццё двухбаковых адносін, у тым ліку пытанні паглыблення інтэграцыі паміж краінамі.