На мінулым тыдні афіцыйная дэлегацыя з Рыгі наведала вёску Тумілавічы Докшыцкага раёна. Там пахаваны міліцыянер Уладзімір Гамановіч.
«Для сённяшніх латышскіх паліцэйскіх гэтае прозвішча з’яўляецца сімвалам мужнасці і вернасці прысязе, — сказаў начальнік дзяржаўнай паліцыі Латвіі генерал Інтс Кюзіс. — Ваш зямляк Уладзімір Гамановіч пасля заканчэння Рыжскага факультэта Мінскай школы міліцыі нёс службу на ахове будынка МУС Латвійскай рэспублікі. У час путча ў студзені 1991-га года, калі пачаўся штурм міністэрства амапаўцамі, ён не пакінуў пост і пры выкананні службовых абавязкаў загінуў. Такім чынам, беларус ахвяраваў сваім жыццём за незалежнасць Латвіі. У Рызе ўстаноўлены памятны камень у гонар мужнасці афіцэра міліцыі Гамановіча. Кожны паліцэйскі Латвіі лічыць сваім гонарам ускласці кветкі да падножжа гэтага помніка-сімвала. Мы кветкі прывезлі сёння ў Беларусь, на малую радзіму героя. Мы добрыя суседзі, і нашы народы заўсёды будуць жыць у міры і згодзе», — перадае словы Кюзіса газета «Родныя вытокі».
У 2010 за заслугі ў барацьбе за незалежнасць Латвіі Уладзімір пасмяротна ўзнагароджаны ордэнам Віестура. Ва Уладзіміра Гамановіча засталося трое дзяцей — дзве дачкі і сын. На могілках латышоў суправаджаў брат нябожчыка Станіслаў Гамановіч.
