7 красавіка ў Канадзе разбіўся аўтобус моладзевай хакейнай каманды «Хамболд Бронкас», якая ехала на выязны матч. У аўтобусе, які сутыкнуўся на трасе з грузавіком, было 29 чалавек: загінула дзесяць гульцоў, кіроўца, два трэнеры, асістэнт і каментатар. Яшчэ 14 чалавек атрымалі траўмы рознай ступені цяжкасці.
Вядома, што Канада — краіна, дзе хакей з'яўляецца нацыянальным відам спорту, тут прыкавана ўвага да каманд розных ліг і ўзростаў.
Канадцы аб'ядналіся, каб падтрымаць сем'і загінулых. За некалькі дзён яны сабралі для іх шэсць мільёнаў даляраў на краўдфандынгавай платформе. А 9 красавіка журналіст Браян Мунц (Brian Munz), які ў пачатку кар'еры асвятляў матчы «Бронкас», распавёў, што ў Саскачэване жыхары ставяць на ганак хакейныя клюшкі ў гонар маладых гульцоў.
Твіт Мунца стаў вірусным, і ў сацсетках з'явіліся сотні здымкаў клюшак. Некаторыя зрабілі гэта дзеля асобных спартсменаў «Бронкас».
