8 кастрычніка ў другой палове дня Еўрапарламент на пасяджэнні ў Бруселі абмяркуе сітуацыю ў Беларусі пасля парламенцкіх выбараў.
Па выніках абмеркавання будзе прынята рэзалюцыя. Плануецца, што галасаванне па дакуменце адбудзецца 9 кастрычніка.
Спачатку было падрыхтавана шэсць праектаў рэзалюцыі — шасцю рознымі фракцыямі Еўрапарламента. 7 кастрычніка пяць фракцый аб’ядналі свае праекты ў адзін.Асобны праект прадставілі аб’яднаныя еўрапейскія левыя/ левыя і зялёныя паўночных краін (GUE/NGL).
Як паведамілі БелаПАН у прэс‑службе Еўрапарламента, чакаецца, што галасаванне адбудзецца па сумесным праекце пяці фракцый. У ім выказваецца шкадаванне аб тым, што выбарчая кампанія ў Беларусі, нягледзячы на вялікія спадзяванні і невялікія паляпшэнні, не была дэмакратычнай. Абраны парламент мае «сумніўную дэмакратычную легітымнасць», лічаць еўрадэпутаты.
У праекце рэзалюцыі ўтрымліваецца заклік да беларускага ўрада ўнесці змяненні ў выбарчае заканадаўства і тым самым пацвердзіць сваю гатоўнасць палепшыць выбарчы працэс. Апрача таго, Еўрапарламент заклікае афіцыйны Мінск паважаць правы чалавека і адмяніць смяротную кару.
Пры гэтым выказана падтрымка рашэнню беларускіх уладаў не спяшацца з прызнаннем Паўднёвай Асеціі і Абхазіі.
Аўтары рэзалюцыі заклікаюць еўраструктуры працягваць дыялог з Мінскам і распрацаваць «дарожную карту» для пакрокавага ўзаемадзеяння,
а таксама перагледзець абмежавальныя меры. У прыватнасці, прапаноўваецца на шэсць месяцаў прыпыніць дзеянне санкцый да чыноўнікаў, якія не маюць дачынення да парушэння дэмакратычных стандартаў выбараў, з тым каб даць уладам магчымасць адмяніць новы закон аб СМІ, які пакуль не ўступіў у сілу.Апрача таго, у дакуменце прапаноўваецца аблегчыць працэдуры атрымання шэнгенскіх віз для беларусаў і знізіць іх кошт, а таксама пашырыць падтрымку грамадзянскай супольнасці, незалежных СМІ, Еўрапейскага гуманітарнага універсітэта.
У праекце рэзалюцыі аб’яднаных еўрапейскіх левых указана, што палітыка ізаляцыі ў дачыненні да Беларусі даказала сваю негрунтоўнасць. Аўтары другога праекта рэзалюцыі заклікаюць еўраструктуры да дыялогу і супрацоўніцтва з Мінскам у мэтах развіцця добрасуседскіх адносінаў і ўзаемаразумення. Для гэтага, лічаць яны, неабходна пашырыць афіцыйныя, дзелавыя і культурныя сувязі з Беларуссю.
