Супрацоўнікі Службы бяспекі Украіны затрымалі і вывезлі з Крыму ва Украіну двух расейскіх вайскоўцаў, заявіла Міністэрства абароны Расіі.
«20 лістапада каля 13.00 супрацоўнікамі Службы бяспекі Украіны былі незаконна затрыманыя і вывезены з Крыма на тэрыторыю Мікалаеўскай вобласці Украіны расійскія вайскоўцы: прапаршчык Адзінцоў Максім Яўгенавіч і малодшы сяржант кантрактнай службы Баранаў Аляксандр Вячаслававіч», — заявілі ў Маскве.
Мінабароны Расіі сцвярджае, што ўкраінскія спецслужбы спрабуюць сфабрыкаваць супраць Баранава і Адзінцова крымінальную справу за ўчыненыя супраць Украіны злачынствы. У ведамстве не выключылі, што для атрымання прызнальных паказанняў на затрыманых будуць аказваць псіхалагічны і фізічны ціск.
У Маскве дзеянні СБУ назвалі «чарговай грубай правакацыяй» і запатрабавалі неадкладнага вяртання затрыманых.
Украінскія СМІ, у сваю чаргу, паведамляюць, што затрыманыя расійскія вайскоўцы раней служылі ва ўкраінскай арміі і супраць іх адкрыта крымінальная справа аб дэзерцірстве. СБУ сцвярджае, што Баранава і Адзінцова затрымалі пры спробе перасекчы пункт пропуску на мяжы з Крымам.
Нагадаем, што раней у лістападзе ФСБ затрымала ў Севастопалі пяць украінцаў. Яна сцвярджае, што гэта дыверсійна-тэрарыстычная група Мінабароны Украіны. Трое падазраваных далі прызнальныя паказанні. Яны заявілі, што вялі назіранне за аб'ектамі Чарнаморскага флоту, а таксама планавалі дыверсіі на інфраструктурных аб'ектах. Іншую групу, як сцвярджаецца, украінскіх разведчыкаў затрымалі раней на поўначы паўвострава.
Група пры гэтым аказала ўзброенае супраціўленне і частка яе сышла за заліў Сіваш.