Страшная і нелагічная гісторыя адбылася ў Смаргоні, паведамляе прэс-служба УУС Гродзенскага аблвыканкама. З вечара пляменнік з дзядзькам у бытавым вагончыку, які стаяў на прыватным падворку дзядзькі, распівалі спіртныя напоі. Праз пару гадзін яны заснулі.
Фота прэс-службы УУС Гродзенскага аблвыканкама
Ноччу больш маладому са сваякоў захацелася выйсці на двор і ў цемры ён выпадкова наступіў на дзядзьку, які спаў на падлозе. Вярнуўшыся, паспрабаваў яго абудзіць, але беспаспяхова. Нецвярозаму мужчыну здалося, што сваяку кепска, ён спалохана патэлефанаваў сваёй жонцы з пытаннем «што рабіць?». Жанчына параіла зрабіць штучнае дыханне.
Начальнік Аддзела аховы правапарадку і прафілактыкі Смаргонскага РАУС маёр міліцыі Дзяніс Рогач распавёў: «На сёння устаноўлена, што пляменнік буйнога целаскладу спрабаваў адпампаваць дзядзьку настолькі няправільна, што ў працэсе зламаў яму грудзіну і рэбры а таксама прычыніў іншыя пашкоджанні. Ад тупой траўмы грудной клеткі і жывата няшчасны памёр на месцы. Крымінальная справа распачата па ч.3 ст.147 КК РБ (наўмыснае прычыненне цяжкага цялеснага пашкоджання, якое пацягнула па неасцярожнасці смерць пацярпелага)».
Не выключана, што ў будучыні магчымая кваліфікацыя дзеянняў падазраванага па іншым артыкуле Крымінальнага кодэкса.