Ва Украіне суд прысудзіў расіяніна Уладзіміра Старкова да 14 гадоў пазбаўлення волі «за ўдзел у вядзенні агрэсіўнай вайны супраць Украіны».
Па словах галоўнага ваеннага пракурора Украіны Анатоля Маціёса, абвінавачаны цалкам прызнаў сваю віну.
Уладзіміра Старкова затрымалі ў чэрвені на КПП «Бярозавае» ў Данецкай вобласці. Сам асуджаны называў сябе кадравым афіцэрам расійскай арміі. У сваю чаргу, у Дзяржпагранслужбе Украіны заявілі, што быў затрыманы набіты боепрыпасамі грузавік, у якім ехаў Старкоў.
Па версіі следства, Старкоў суправаджаў грузавік з боепрыпасамі ў населены пункт Яснае Данецкай вобласці, аднак па памылцы апынуўся на КПП украінскіх войскаў.
У цяперашні час ва Украіне чакаюць суду двое расейцаў — Аляксандр Аляксандраў і Яўген Ерафееў, якія сцвярджаюць, што з'яўляюцца дзеючымі вайскоўцамі, аднак у міністэрстве абароны Расіі сцвярджаюць, што абодва звольніліся з войска.