Канструктарскія працы па стварэнні новага расейскага танка на платформе «Армата» працягнуцца да канца 2015 года, паведаміў камандуючы сухапутнымі войскамі РФ генерал-палкоўнік Алег Салюкоў.
Раней віцэ-прэм'ер Расеі Дзмітрый Рагозін неаднаразова заяўляў, што танк будзе прадэманстраваны публіке ў Маскве на парадзе 9 мая 2014 года.
Мадэль танка на шасі «Армата», якую паказвалі Рагозіну некалькі год таму.
Цяжкая гусенічная платформа «Армата» распрацоўваецца Уралвагонзаводам з 2009-2010 году, на яе базе плануецца стварыць сямейства баявых машын рознага прызначэння: ад танка і БМП да самаходных артылерыйскіх гармат і рэмонтна-эвакуацыйных машын.
Пакуль невядома, як будзе выглядаць танк на платформе «Армата», але большасць назіральнікаў лічыць, што экіпаж танка будзе цалкам схаваны ў бранякапсуле ў корпусе машыны, адкуль праз камп'ютарныя сістэмы будзе кіраваць вежай і ўзбраеннем.
Выкарыстанне падобных схем кампаноўкі заходнія краіны (напрыклад, ЗША і Францыя) разглядалі для сваіх танкаў у 1980-90-я гады.
Адзін з магчымых варыянтаў таго, як будзе выглядаць танк «Армата».
Адначасова Расія распрацоўвае баявую машыну пяхоты на базе «Армата», баявую машыну пяхоты «Курганец-25» і бронетранспарцёр «Бумеранг». Пасля таго, як гэтая тэхніка пройдзе дзяржаўныя выпрабаванні, армія закупіць па некалькі дзясяткаў адзінак кожнага тыпу бранятэхнікі – па адным батальённым камплекце, паведаміла расейскае агенцтва РІА, цытуючы Салюкова.
Танк Т-90 – яго ў будучыні мусяць замяніць танкамі на платформе «Армата».
З 2003 па 2013 год ваенны бюджэт Расіі па афіцыйных дадзеных вырас прыкладна з $20 млрд да $76 млрд, што дазволіла пачаць маштабную праграму пераўзбраення войска і флоту.
